9 مئی جی ایچ کیو حملہ کیس : عمران خان پر فرد جرم عائد

9 مئی کو جی ایچ کیو حملہ کیس میں عمران خان  پر فرد جرم عائد کر دی گئی۔

انسداد دہشت گردی عدالت کے جج امجد علی شاہ نے اڈیالہ جیل میں 9 مئی جی ایچ کیو حملہ کیس کی سماعت کی۔

سماعت کے موقع پر عمران خان  اور شاہ محمود قریشی کو کمرہ عدالت میں پیش کیاگیا۔عمرایوب، شیخ رشید،فواد چوہدری،زرتاج گل اور راجہ بشارت سمیت دیگر ملزمان بھی پیش ہوئے۔

وکلاء کےدلائل مکمل ہونے کےبعد  جج امجد علی شاہ نے فرد جرم کمرہ عدالت میں پڑھ کر سنائی۔

عمران خان کے علاوہ  شیخ رشید سمیت دیگر ملزمان پر بھی فرد جرم عائد کی گئی ہے۔

عمران خان سمیت دیگر ملزمان نے صحت جرم سے انکار کیاہے۔

سانحہ 9 مئی جی ایچ کیو حملہ کیس کا مقدمہ تھانہ آر اے بازار میں درج ہے۔ مقدمےمیں عمران خان  سمیت 143 ملزمان نامزد ہیں۔

عدالت 23 ملزمان کو پہلے ہی اشتہاری قرار دےچکی ہے۔اشتہاری قرار دیےگئے ملزمان میں شہباز گل،ذلفی بخاری اور مراد سعید بھی شامل ہیں۔

پی ٹی آئی کی قیادت کے 70 رہنماؤں پر الزام ہےکہ انہوں نے 9 مئی کی منصوبہ سازی کی۔ان پر الزام ہےکہ کارکنان کو جلاؤ گھیراؤ اور عسکری وسرکاری تنصیبات پر حملوں کے لیے اکسایا۔

عدالت نے استغاثہ کی شہادت رکارڈ کرنے کےلیے 10 دسمبر کی تاریخ مقرر کر دی۔

دوسری جانب سماعت ختم ہونے کےبعد اڈیالہ جیل سے باہر پولیس نے اپوزیشن لیڈر عمرایوب، ملک احمد چٹھہ اور سابق صوبائی وزیر راجہ بشارت کو گرفتار کرلیا۔