پاک آذربائیجان تعلقات کو مزید مضبوط بنائیں گے : وزیر اعظم شہباز شریف
وزیراعظم شہباز شریف کا کہنا ہے کہ برف کی چادر میں لپٹے دلکش شہر باکو پہنچا ہوں اور پاک آذربائیجان تعلقات کو مزید مضبوط بنانے کےلیے مفید بات چیت کا منتظر ہوں۔
آذربائیجان کے 2 روزہ دورے پر باکو پہنچنے کےبعد سوشل میڈیا پر اپنی پوسٹ میں وزیر اعظم شہباز شریف نے لکھا کہ خوبصورت شہر باکو میں اترا ہوں جو ماضی اور مستقبل کا حسین امتزاج ہے۔ یہ شہر برف کی چادر تلے اور بھی دلکش لگتا ہے۔
شہباز شریف نے کہاکہ وہ پاکستان اور آذربائیجان کے درمیان گہرے تعلقات کو مزید مضبوط بنانے کےلیے مفید بات چیت کے منتظر ہیں۔ہم اپنے تجارتی اور سرمایہ کاری تعلقات کو مزید فروغ دینے کےبھی خواہاں ہیں۔
یاد رہے کہ وزیر اعظم شہباز شریف وفد کے ہمراہ دو روزہ سرکاری دورے پر آذربائیجان کے دارالحکومت باکو پہنچ گئے ہیں۔
حیدر علیوف انٹرنیشنل ائیرپورٹ پر آذربائیجان کے اول نائب وزیر اعظم یعقوب عبداللہ اوعلو ایوبوف،نائب وزیر خارجہ یالچین رفائیف، پاکستان میں آذربائیجان کےسفیر خضر فرخادوف، آذربائیجان میں پاکستان کےسفیر قاسم محی الدین اور دیگر سینیئر حکام نے وزیر اعظم کا استقبال کیا۔
وزیراعظم 2 روزہ دورے پر آذربائیجان پہنچ گئے
وزیر اعظم شہباز شریف آذربائیجان کےصدر الہام علیوف اور دیگر اعلیٰ آذربائیجانی حکام کےساتھ اعلیٰ سطحی ملاقاتیں کریں گے۔
بات چیت میں دو طرفہ تعلقات کی مضبوطی، تجارت اور سرمایہ کاری میں وسعت،توانائی و دفاعی تعاون کے فروغ،ماحولیاتی تبدیلی کےمضر اثرات سے نمٹنے کےلیے تعاون اور ثقافتی تبادلوں کو فروغ دینے پر تبادلہ خیال ہوگا۔
