پاکستان نے بھارت کے 2 رافیل سمیت 5 طیاروں کو تباہ کیا : امریکی اخبار

امریکی اخبار کا کہنا ہے کہ حالیہ پاک بھارت جنگ میں پاکستان نے بھارت کے 2 رافیل سمیت 5 طیاروں کو تباہ کیا، بھارت کو سب سےزیادہ نقصان لڑاکا طیارے کی تباہی سےہوا۔تاہم بھارتی حکومت نے تاحال یہ تصدیق نہیں کی کہ پاکستان نے اس کے کتنے طیاروں کو تباہ کیا۔

امریکی اخبار نیویارک ٹائمز کےمطابق بھارت اور پاکستان کے درمیان 4 روزہ جنگ دونوں ایٹمی ممالک کےدرمیان نصف صدی میں وسیع ترین لڑائی تھی۔ س جنگ میں دونوں ممالک نے ایک دوسرےکے فضائی دفاعی نظام کی صلاحیت جانچنے کےلیے ڈرونز اور میزائل حملےکیے۔

اخبار کےمطابق جدید ٹیکنالوجی کےدور میں ہوئی اس جنگ میں دونوں ہی ممالک نے کم اہداف ہی کو نشانہ بنایا۔ان حملوں میں کئی فوجی تنصیبات کو نشانہ بنایا گیا اور دونوں ممالک کا دعویٰ تھاکہ حریف کو شدید نقصان پہنچایا گیاہے۔

تاہم امریکی اخبار کےمطابق سیٹیلائٹ تصاویر اس بات کی نشاندہی کرتی ہیں کہ حملےتو بہت وسیع تر حصوں پر کیےگئے لیکن بیانات کے برعکس نقصان کہیں زیادہ محدود تھا۔

اخبار کےمطابق یہ واضح ہےکہ دونوں ممالک کی افواج کو جانی نقصان ہوا۔ بھارت نے تسلیم کیاکہ اس کے پانچ فوجی ہلاک ہوئے ہیں جب کہ پاکستان میں 13 فوجی اہلکار شہید ہوئے۔

امریکی اخبار کے مطابق پاکستان نے بھارت کے 2 رافیل سمیت 5 طیاروں کونشانہ بنایا۔بھارت کو سب سے زیادہ نقصان لڑاکا طیارےکی تباہی سے ہوا۔تاہم بھارتی حکومت نے تاحال یہ تصدیق نہیں کی کہ پاکستان نے اس کے کتنے طیاروں کو تباہ کیا۔

اہلکاروں اور سفارتکاروں کےنزدیک بھارت کے کم سےکم 2 طیاروں کو نقصان ہوا اور یہ عین ممکن ہےکہ تعداد اس سے زیادہ ہو۔

حملوں سے پہلے اور بعد کی سیٹیلائٹ تصاویر کا موازنہ کرتےہوئے امریکی اخبار نے لکھاکہ پاکستان میں تنصیبات کو بھی نقصان واضح ہے۔بھارت کا دعویٰ ہےکہ اس نے بھولاری ائیربیس کے ہینگر پر حملہ کیاتھا اور اخبار کےمطابق سیٹلائٹ تصاویر سے بھی لگتا ہےکہ نقصان بظاہر ہینگر ہی کو پہنچا۔

اخبار کےمطابق بھارت کی جانب سے پاکستان میں ہدف بنائی گئی سب سےزیادہ حساس تنصیب نور خان ائیر بیس ہے۔

اخبار کےمطابق بھارتی فوج کا دعویٰ ہےکہ اس نے اہم ائیر بیس کے رن وے اور دیگر تنصیبات پر حملےکیے تھے اور سیٹیلائٹ تصاویر سے یہ بھی واضح ہے۔

اخبار کےمطابق 10 مئی کو پاکستان کی جانب سے نوٹس بھی جاری کیاگیا تھاکہ رحیم یار خان ائیربیس کا رن وے آپریشنل نہیں۔سرگودھا ائیر بیس کے بارے میں بھی بھارتی حکام کاکہنا ہےکہ اس کے رن وے کے دو حصوں کو نشانہ بنایاگیا۔

امریکی اخبار کاکہنا ہےکہ پاک فوج نے کہاکہ اس نے بھارت کی 2 درجن فوجی تنصیبات اور ائیر بیس ہدف بنائےہیں۔بھارتی حکام نے تسلیم کیا ہےکہ اس کے 4 ائیر بیس کو محدود نقصان پہنچا ہے لیکن نے تفصیل نہیں دی۔

اخبار کےمطابق جن اہداف کو پاک فوج نے نشانہ بنایاہے اس کی سیٹیلائٹ تصاویر انتہائی محدود ہیں اور فی الحال وہ یہ واضح طور پر ظاہر نہیں کرتیں کہ حملوں سے ائیر بیسز پر بھی نقصان پہنچا ہو۔

اخبار نے وجہ نہیں بتائی کہ آخر بھارت میں فوجی اڈوں پر حملوں سے پہنچےنقصان کی سیٹیلائٹ تصاویر واضح کیوں نہیں تاہم اتنا ضرور تسلیم کیاکہ یہ وہی فوجی اڈےہیں جہاں پاکستان کی فوجی کارروائی سے متعلق ٹھوس شواہد موجود ہیں۔

امریکی اخبار نے پاکستان کےسرکاری میڈیا کےحوالے سے کہاکہ افواج پاکستان نے اُودھم پور ائیر بیس کو تباہ کر دیا تھا۔اس ضمن میں ایک بھارتی خاندان نے تصدیق کی ہےکہ ان کےگھر کا فرد فوجی اُسی ائیر بیس پر ہلاک ہوا لیکن 12 مئی کو سیٹلائٹ سے لی گئی تصویر میں اس ائیر بیس کو نقصان بھی واضح نہیں۔

اخبار نے یہ واضح نہیں کیاکہ پاکستان سے پے در پے بھارت پر داغےگئے میزائلوں نے اہداف کو نقصان نہیں پہنچایا تو آخر انہیں آسمان کھاگیا یہ زمین نگل گئی۔

اخبار نےیہ بھی نہیں بتایاکہ بھارت کی جانب سے حملوں میں پاکستان میں مساجد اور گھروں کو نقصان پہنچااور عام شہریوں کی بھی اموات ہوئی ہیں۔