وزیراعظم شہباز شریف کی غزہ پر اسرائیلی قبضے کے منصوبے کی شدید مذمت
وزیراعظم شہباز شریف نے اسرائیلی کابینہ کی جانب سے غزہ شہر پر قبضے کے منصوبے کی منظوری کی شدید الفاظ میں مذمت کرتے ہوئے کہا کہ یہ فلسطینی عوام کے خلاف پہلے سے جاری تباہ کن جنگ میں خطرناک اضافے کے مترادف ہے۔
وزیر اعظم شہباز شریف کا کہنا تھا کہ ہم اسرائیلی کابینہ کی جانب سے غزہ شہر پر غیرقانونی اور ناجائز قبضے کے منصوبےکی منظوری کی سخت الفاظ میں مذمت کرتے ہیں،یہ پہلے سے ہی تباہ کن جنگ میں خطرناک اضافہ ہےجو فلسطینی عوام کےخلاف جاری ہے۔’
شہباز شریف نے کہا کہ فوجی کارروائیوں کے پھیلاؤ سے موجودہ انسانی بحران مزید سنگین ہوجائے گا، ہمیں اس المیے کی اصل وجہ کو نظر انداز نہیں کرنا چاہیےاور وہ ہے فلسطینی سر زمین پر اسرائیل کا طویل عرصے سےجاری غیرقانونی قبضہ،جب تک یہ قبضہ جاری رہے گا، امن ایک خواب ہی رہے گا۔
وزیر اعظم شہباز شریف نے اعادہ کیاکہ پاکستان فلسطینی عوام کے جائز حقوق کی غیرمتزلزل حمایت کرتا رہےگا،جن میں حق خود ارادیت اور ایک آزاد و خودمختار فلسطینی ریاست کا قیام شامل ہے،جس کا دارالحکومت القدس الشریف ہو، اور یہ سب متعلقہ اقوام متحدہ اور او آئی سی قراردادوں کےمطابق ہو۔
شہباز شریف نے عالمی برادری سےفوری مداخلت کی اپیل کی تاکہ اسرائیل کی بلاجواز جارحیت کو فوراً روکا جاسکے، بےگناہ شہریوں کے تحفظ کو یقینی بنایا جاسکے، اور غزہ کے عوام تک نہایت ضروری انسانی امداد پہنچائی جاسکے۔
