افغانستان کے ساتھ مذاکرات کے بغیر مسائل حل نہیں ہوں گے : علی امین گنڈاپور
وزیر اعلیٰ خیبرپختونخوا علی امین گنڈاپور کاکہنا ہےکہ ملک میں دہشت گردی نے دوبارہ سر اٹھا لیا ہے، افغانستان کے ساتھ مذاکرات کےلیے ٹی او آرز بنائے ہیں، افغانستان سے بغیر بات چیت کے یہ مسائل حل نہیں ہوں گے۔
وزیراعلیٰ خیبرپختونخوا علی امین گنڈاپور کاکہنا تھا کہ کرم میں جن لوگوں نے حملہ کیا ان کو نہیں چھوڑا جائے گا، ضلع کرم میں امن و امان قائم رکھنے کےلیے کام کررہے ہیں۔
علی امین گنڈاپور نے کہا کہ افغانستان کے ساتھ مذاکرات کےلیے ٹی او آرز بنائے ہیں، افغانستان سے بغیر بات چیت کے یہ مسائل حل نہیں ہوں گے،دہشت گردی صرف خیبرپختونخوا تک محدود نہیں رہےگی، یہ پورے ملک میں پھیلےگی۔
وزیر اعلیٰ علی امین گنڈاپور کاکہنا تھا کہ ہمارے صوبے کے پیسے نہیں دیے جارہے، حیران ہوں کہ وفاق تو ہم پر سیاسی مقدمات قائم کررہا ہے لیکن امن و امان کی صورت حال پر توجہ نہیں دے رہا،پی ٹی ایم پر مقدمات وفاق نے بنائےہیں ہم اس کے حق میں نہیں۔
وفاقی حکومت کو تنقید کا نشانہ بناتےہوئے وزیر اعلیٰ علی امین گنڈا پور کا کہنا تھا کہ یہ دہشت گردی روکنے کےلیے پالیسی نہیں بنارہے،ان کو کوئی پرواہ ہی نہیں، قرضوں پر قرضے لیے جارہے ہیں، ان کی کیا کارکردگی ہے؟ حکومت نے ساری توجہ پی ٹی آئی پر دی،دہشت گردی نے دوبارہ سر اٹھالیا۔
لاہور ہائی کورٹ : نئے ایڈیشنل ججز نے حلف اٹھا لیا
انہوں نےکہا کہ پنجاب حکومت اشتہارات دے رہی ہیں،کارکردگی کچھ نہیں،میں بھی ویڈیوز بنانا شروع کردوں تو اس سےکیا کارکردگی ظاہر ہوگی۔
ان کا کہنا تھا کہ ارباب نیاز اسٹیڈیم کا نام عمران خان کے نام سے منسوب کرنا عوام کی خواہش تھی، عمران خان کو اسٹیڈیم سے متعلق غلط رپورٹ پیش کی گئی، اسٹیڈیم میں خیبرپختونخوا کا اپنا سپر لیگ بھی شروع کررہے ہیں۔
