توشہ خانہ کیس میں عمران خان پر فرد جرم عائد ہوگئی
توشہ خانہ کیس میں ڈسٹرکٹ اینڈ سیشن کورٹ نے عمران خان پر فرد جرم عائد کردی۔عمران خان نے صحت جرم سے انکار کرتے ہوئے دستاویزات پر دستخط سے انکارکردیا۔
توشہ خانہ کیس کی سماعت پولیس لائن ہیڈکوارٹر ایچ الیون کے گیسٹ ہاؤس میں ہوئی جہاں عمران خان کو پیش کیا گیا،کمشنر آفس نے حفاظتی وجوہات کے باعث پولیس لائنز کو عدالت کا درجہ دیا ہے۔
ایڈیشنل سیشن جج ہمایوں دلاور نے آج عمران خان کو فرد جرم عائد کرنے کے لیے ذاتی حیثیت میں طلب کیا تھا۔
قبل ازیں چیئرمین پی ٹی آئی عمران خان نے توشہ خانہ فوجداری کیس میں فرد جرم کی کارروائی کا بائیکاٹ کردیا۔ وکلاء نے کیس کسی اور جج کو منقل کرنے کی استدعا کردی تاہم عدالت نے اسے مسترد کردیا۔پاکستان تحریک انصاف کے چیئرمین عمران خان کیخلاف پولیس ہیڈ کوارٹرز کے گیسٹ ہاؤس میں قائم عدالت میں توشہ خانہ فوجداری کیس میں فرد جرم عائد کرنے کی کارروائی ہوئی۔
چیئرمین پی ٹی آئی نے توشہ خانہ فوجداری کیس میں فرد جرم کی کارروائی کا بائیکاٹ کردیا، ان کے وکلاء نے کیس کسی اور جج کو منتقل کرنے کی استدعا کردی۔
عدالت نے عمران خان کے وکلاء کی استدعا مسترد کردی۔ وکلاء نے کہا کہ عدالت نے فرد جرم عائد کرنا چاہی ہم بائیکاٹ کرکے باہر آگئے ہیں۔
