راولپنڈی میں پی ٹی آئی دھرنے کا تیسرا روز، عوام پریشانی سے دوچار
پاکستان تحریک انصاف کے چیئرمین عمران خان پر قاتلانہ حملے کے خلاف راولپنڈی میں احتجاجی دھرنا تیسرے روز میں داخل ہوگیا ، کارکنوں نے کئی راستے بند کر کے مظاہروں کا سلسلہ جاری رکھا ہوا ہے۔
عمران خان پر قاتلانہ حملے کے خلاف اسلام آباد کے جڑواں شہر راولپنڈی مری روڈ سمیت مختلف مقامات پر پی ٹی آئی کارکنان آج تیسرے روز بھی احتجاج کر رہے ہیں، مختلف مقامات پر جاری مظاہروں کی وجہ سے مری روڈ، پیرودھائی موڑ، گلزار قائد اولڈ ائیرپورٹ روڈ ،سرائے کال چوک ٹیکسلا ،رتہ شاہ چوک مارگلہ ،موٹر وے ایم ٹو، اسلام آباد لاہور ٹول پلازہ کے قریب سے بند کیے گئے ہیں۔
مظاہرین نے سواں پل ایس او ایس ویلج کے قریب بھی راولپنڈی کی جانب والے راستے کو بند کر رکھا ہے جبکہ ٹریفک کو سڑک کے ایک جانب سے گزارا جا رہا ہے، سڑکیں اور راستے بند ہونے کے باعث مری میں ٹریفک کا نظام آج تیسرے روز بھی شدید متاثر ہے۔یوم اقبال کی عام تعطیل کے باعث تعلیمی ادارے، سرکاری و نجی دفاتر بند ہیں، تاہم روز مرہ کے معمولات زندگی کے لیے جڑواں شہروں میں آمد رفت کے لیے شہریوں کو شدید پریشانی کا سامنا کرنا پڑ رہا ہے۔
دوسری جانب جی ٹی روڈ سواں پل کے قریب پی ٹی آئی کے دھرنے کے باعث مال بردار گاڑیوں کی طویل قطاریں لگ گئیں، جس سے مسافر گاڑیوں سمیت دیگر ٹریفک بھی جام ہوگیا۔
