عمران خان کو نومبر کے ہول پڑ رہے ہیں
وزیر دفاع خواجہ آصف نے کہا ہے کہ عمران خان کو نومبر کے ہول پڑ رہے ہیں،اس نے اسٹیبلشمنٹ سے بات چیت کرنے کے لیے صدر مملکت ڈاکٹر عارف علوی کے ہاتھ پیغام بھجوایا ہے۔
خواجہ آصف نے اسلام آباد میں پریس کانفرنس کرتے ہوئے کہا کہ عمران خان اب منتیں ترلے کر رہا ہے جبکہ اسکو نومبر کے ہول بھی اٹھ رہے ہیں، نومبر کے خوف نے عمران خان کا دماغی توازن بگاڑ دیا ہے لیکن نومبر آئین و قانون کے مطابق گزر جائے گا، آرمی چیف کی تقرری کا عمل ماہ رواں کے آخر یا نومبر کے شروع میں ہوگا، سبکدوش آرمی چیف جنرل قمر جاوید باجوہ کو اتنا وقت ملنا چاہیے کہ وہ احترام کے ساتھ اپنے جوانوں کے پاس وقت گزار سکے۔
انکا کہناتھا آرمی چیف کے بیان سے ابہام دور ہوا ہے لیکن آرمی چیف کون ہوگا اس کا فیصلہ نہیں ہوا البتہ روایت کے مطابق پانچ افراد کے نام جاتے ہیں جن میں سے کسی کو بھی تعینات کیا جاسکتا ہے۔ انہوں کہا کہ ماضی میں پانچ نمبر سے باہر سے بھی لوگ تعینات کیے گئے اور سب تھری اسٹارز جنرل اس کے لیے اہل ہیں۔
خواجہ آصف نے عمران خان پر تنقید کرتے ہوئے کہا کہ عمران خان کیسز معاف کرنے کی بات کرتے ہیں لیکن کیسز تو اس خاتون کے معاف ہوئے جو عمران خان اور انکی اہلیہ کے ساتھ تیسری ٹرسٹی ہے، عمران خان منافقت سے کام لیتا ہے۔
وزیر دفاع نے کہاعمران خان پاکستان کی سیکیورٹی فورسز سے متعلق جھوٹ بولتا ہے لیکن فوج کے ساتھ کھڑا ہونا ہمارا فرض ہے، فوجی افسران کی ہیلی کاپٹر میں شہادت پر پی ٹی آئی نے غلط زبان استعمال کی، ہماری فوج آج بھی دہشتگردی کے خلاف جنگ لڑ رہی ہے اور دہشتگردی کے خلاف جنگ آج بھی جاری ہے، پاکستان کو سیلابی صورتحال کا سامنا ہے جہاں افواجِ پاکستان اور ساری قوم سیلاب زدگان کی مدد کے کام میں لگی ہوئی ہے۔ انتخابات اپنے وقت پر منعقد ہوں گے۔
