متحدہ اپوزیشن کا مشترکہ مشاورت اجلاس پیر کو طلب
حکومت کے خلاف تحریک عدم اعتماد کی ریکوزیشن قومی اسمبلی میں جمع کروانے کے بعد متحدہ اپوزیشن نے مشترکہ مشاورت اجلاس پیر کو اپوزیشن لیڈر شہباز شریف کی رہائش گاہ پر طلب کر لیا، اجلاس کے دوران اپوزیشن رہنماؤں کو عشائیہ بھی دیا جائے گا۔
دوران اجلاس پی ڈی ایم سربراہ اور امیر جمعیت علمائے اسلام ف مولانا فضل الرحمان اور پیپلز پارٹی کے چیئرمین بلاول بھٹو زرداری بھی شرکت کریں گے جبکہ سابق صدر آصف علی زرداری کو بھی مدعو کیا گیا ہے۔ اس کے علاوہ سردار اختر مینگل سمیت اپوزیشن کی تمام جماعتوں کے قائدین کو دعوتی دی گئی ہے۔
وزیراعظم عمران خان کے خلاف تحریک عدم اعتماد کے حوالے سے حکمت عملی مرتب کی جائے گی، حکومتی اتحادی جماعتوں سے رابطوں کا بھی جائزہ لیا جائے گا، اجلاس میں پارلیمنٹ لاجز پر پولیس کی ریڈ اور ایم این ایز پر تشدد اور گرفتاری کے بعد کی صورتحال پر حکمت عملی پر بھی مشاورت کی جائے گی۔
