نئے آرمی چیف،جوائنٹ چیفس کمیٹی کو امریکی سفارنے کی مبارکباد

پاکستان کے نئے آرمی چیف جنرل عاصم منیر اور جوائنٹ چیفس آف سٹاف کمیٹی جنرل ساحر شمشادکواسلام آباد میں امریکی سفارتخانے کی جانب سے مبارکباد پیش کی گئی ہے۔

سماجی رابطوں کی ویب سائٹ ٹوئٹر پر امریکی سفارتخانے نے اپنے مختصر بیان میں کہا ہے کہ ہم تجارت اور سرمایہ کاری، صحت، موسمیاتی تبدیلی، شمولیتی طرز حکومت اور علاقائی سلامتی سے متعلق مشترکہ مفادات کو فروغ دینے کے لیے پاکستان کے منتخب قیادت، عسکری حکام اور معاشرے کے مختلف شراکت داروں کے ساتھ مل کر کام کرنے کے خواہشمند ہیں۔

خیال رہے کہ 24 نومبر 2022 کو وفاقی کابینہ کے خصوصی اجلاس کی منظوری کے بعد وزیراعظم نے جنرل عاصم منیر کو آرمی چیف جبکہ جنرل ساحر شمشاد مرزا کو چیئرمین جوائنٹ چیفس آف سٹاف مقرر کرنے کا فیصلہ کیا تھا۔

واضح رہے کہ پاکستان میں آرمی چیف کی تعیناتی کو ہمیشہ ہی اہم سمجھا جاتا ہے اور ذرائع ابلاغ کئی ماہ پہلے سے اس حوالے سے خبریں نشر کرنے اور اندازے لگانے شروع کر دیتے ہیں۔