پی ٹی آئی کارکنوں کا احتجاج ،اپوزیشن کے ہوٹل میں گھسنے کی کوشش

لاہورمیں تحریک انصاف کے کارکنوں نے اپوزیشن ارکنان کیخلاف احتجاج کرتے ہوئے ان کے ہوٹل میں گھسنے کی کوشش کی،جسے پولیس نے ناکام بنا دیا۔
اپوزیشن کے اراکین پنجاب اسمبلی اور منحرف پی ٹی آئی ارکان گلبرگ کے ایک نجی ہوٹل میں قیام پذیر ہیں۔ تحریک انصاف کے کارکن ریلی کی شکل میں ہوٹل کے باہر پہنچ گئے اور شدید احتجاج کیا جس کے باعث ٹریفک کی روانی متاثر ہوگئی۔ مظاہرین نے ہوٹل کے باہر نعرے بازی بھی کی۔ انہوں نے ٹرک پر پارٹی نغمے اور ترانے بھی لگا رکھے تھے۔ پی ٹی آئی کارکنوں نے ہوٹل میں گھسنے کی کوشش کی اور بیرئیر ہٹانے لگے لیکن پولیس نے ان کی کوشش ناکام بنا دی۔ مین بلیوارڈ پر واقع ہوٹل کے باہر پولیس کی بھاری نفری تعینات ہے۔ ایک موقع پر صورتحال کافی کشیدہ ہوگئی اور تصادم کا خطرہ پیدا ہوگیا جب لیگی اراکین اسمبلی نے تحریک انصاف کے کارکنوں کی جانب اشتعال انگیز انداز میں بڑھنے کی کوشش کی۔ جوابا تحریک انصاف کے کارکن بھی سڑک پار کر کے نعرے بازی کرتے ہوئے آگے آ گئی، پولیس نے بمشکل بیچ بچاؤ کروایا گیا اور آہنی رکاوٹیں کھڑی کرکے تحریک انصاف کے کارکنوں کو پیچھے کردیا۔ لیگی اراکین پنجاب اسمبلی نے پولیس سے تحریک انصاف کا مظاہرہ ختم کروانے کا مطالبہ کیا۔
اپوزیشن کی صوبائی پارلیمانی پارٹی کا مشترکہ اجلاس آج اسی ہوٹل میں ہوگا اور عبدالعلیم خان بھی وہاں موجود ہیں۔ اجلاس کی صدارت وزارت اعلی کے امیدوار حمزہ شہباز کرینگے جو اراکین کے اعزاز میں افطار ڈنر بھی دینگے۔