ڈپٹی سپیکر پنجاب اسمبلی کیخلاف تحریک عدم اعتماد منظور

پنجاب اسمبلی میں ڈپٹی سپیکر دوست محمد مزاری کیخلاف تحریک عدم اعتماد اور نئے سپیکرکے انتخاب کیلئے قرارداد کثرت رائے سے منظور کرلی گئی۔

پنجاب اسمبلی کا اجلاس چیئرمین نواب زادہ وسیم خان بادوزئی کی زیر صدارت شروع ہوا، جس میں حکومتی رکن اسمبلی محمد بشارت راجہ نے قرارداد پیش کرنے کے لیے رولز کو معطل کرنے کی درخواست کی۔ ایوان کی اجازت کے بعد محمد بشارت راجہ نے نئے اسپیکر کے انتخاب اور ڈپٹی اسپیکر کو ہٹانے کے لیے قرارداد پیش کی۔

ڈپٹی سپیکر کیخلاف تحریک عدم اعتماد کی قرارداد کے متن میں کہا گیا کہ چوہدری پرویز الٰہی کے وزیراعلیٰ منتخب ہونے پر اسپیکر کا عہدہ خالی ہوگیا ہے اس لیے یہ ایوان رولز آف پروسیجر کے قاعدہ 11 (1) اور 12 (3) کو معطل کر کے اسپیکر کا انتخاب چاہتا ہے، نیز ڈپٹی اسپیکر کے خلاف عدم اعتماد کے لیے کل 29 جولائی جمعتہ المبارک ، سہ پہر 4 بجے مقرر کرتا ہے۔

پنجاب اسمبلی کے ایوان میں قرارداد پیش ہونے کے بعد ارکان نے اسے کثرت رائے سے منظور کرلیا۔

قرارداد کثرت رائے سے منظور ہونے کے بعد چئیرمین نے اسپیکر کے انتخاب کے لیے کل چار بجے کا وقت مقر کردیا۔

اس کے بعد چئیرمین نے اسپیکر کے انتخاب کے لیے طریقہ کار بیان کیا جس کے مطابق اسپیکر کے انتخاب کے لیے آج شام 5 بجے تک کاغذات نامزدگی جمع ہوں گے، کاغذات نامزدگی کی جانچ پڑتال آج شام 5 بج کر 10 منٹ پر ہوگی، کل شام 4 بجے رائے شماری سے پہلے کسی بھی وقت کاغذات نامزدگی واپس لیے جاسکتے ہیں، جبکہ سپیکر کا انتخاب خفیہ رائے شماری سے ہوگا۔