پاک فوج اور شہدا کیخلاف منفی مہم پی ٹی آئی نے چلائی

وفاقی وزیر داخلہ رانا ثنا اللہ نے کہا ہے کہ پاک فوج اورشہدا کیخلاف سوشل میڈیا پرمنفی مہم عمران نیازی کی جماعت پی ٹی آئی نے چلائی، جس سے ان کی ملک دشمنی سامنے آتی ہے،اگر انہوں نے 13 اگست کو قانون توڑا تو 25 مئی سے بھی برا حشر ہوگا۔

فیصل آباد میں پریس کانفرنس کرتے ہوئے انکا کہنا تھا پوری قوم پاک فوج کے شہدا کے ساتھ کھڑی ہے، تمام شہداء کو سلام پیش کرتا ہوں، فوج کے خلاف منفی پروپیگنڈا کرنے والے گمراہ ہیں ایسی گندی مہم چلانے والوں کی نشاندہی ہوگئی ہے، عمران نیازی کی پارٹی نے فوج کے خلاف منفی مہم چلائی، اس مہم سے ان کی ملک دشمنی سامنے آتی ہے۔

انہوں نے کہا پی ٹی آئی کا سربراہ قوم کو تقسیم کر رہا ہے، یہ نوجوانوں کو اور پوری قوم کو گمراہ کر رہا ہے، الیکشن کمیشن نے فارن ایجنٹ کے طورپر عمران خان کی شناخت کی ہے، الیکشن کمیشن کے فیصلے کے بعد اس کا دماغی توازن بگڑ گیا جس میں اب کوئی شک نہیں رہا، عمران خان کو نہ روکا گیا تو یہ قوم کو کسی حادثے سے دوچار کر دے گا۔

وزیر داخلہ نے کہا ثابت ہوگیا کہ عمران نیازی غیرملکی ایجنٹ ہے، عمران خان نے گمراہی میں جو باتیں کی ان کی صرف مذمت ہی کی جا سکتی ہے یہ باتیں دہرائی نہیں جاسکتیں۔

انہوں نے کہا تین چار دن پہلے عمران خان نے کہا کہ اس چیف الیکشن کمشنر کے ہوتے ہوئے ہم الیکشن نہیں لڑیں گے، پہلے چیف الیکشن کمیشن کو تو ہٹالیں، پھر اسمبلیاں توڑیں جو استعفے دیے ہیں وہ منظور کرائیں اس کے بعد انتخابات کی بات کریں۔

انکا کہنا تھا تحریک انصاف والے 13 کو جلسہ لیاقت باغ یا پریڈ گراؤنڈ میں کرنا چاہتے ہیں تو کریں لیکن یاد رہے کہ 13 اگست کو پی ٹی آئی کو صرف پرامن جلسے کی اجازت ہے، پی ٹی آئی نے اگر قانون توڑا اور دھونس و دھمکی کا راستہ اپنایا تو 25 مئی سے زیادہ برا حشر ہوگا۔

رانا ثنا اللہ نے کہا افغانستان میں ڈرون حملہ ہوا ہے، افغانستان نے کبھی پاکستان پر ایسا الزام نہیں لگایا لیکن یہ بدبخت پاکستان میں رہتے ہوئے پاکستان پر الزام عائد کرتے ہیں۔

Related Articles

Back to top button