حریم شاہ کا شوہر سندھ پولیس کا سابق سپاہی نکلا

سندھ پولیس نے معروف ٹک ٹاکر حریم شاہ کے شوہر بلال شاہ کے خلاف چارج شیٹ جاری کرتے ہوئے انکشاف کیا ہے کہ وہ کراچی پولیس کا سابق ملازم ہے جسے منشیات فروشی اور جرائم پیشہ سرگرمیوں میں ملوث ہونے کی بنا پر برطرف کردیا گیا تھا۔

سندھ پولیس اور اسکی سپیشل کرائم برانچ نے بلال شاہ سے متعلق دعویٰ کیا ہے کہ وہ پولیس میں سپاہی تھا لیکن جرائم پیشہ سرگرمیوں میں ملوث ہونے کی وجہ سے اسے گزشتہ سال برطرف کر دیا گیا تھا۔ پولیس اور انٹیلی جنس اداروں کی رپورٹ میں انکشاف کیا گیا ہے کہ بلال شاہ کیخلاف ثبوت موجود ہیں کہ وہ مساج سینٹرز سے بھتہ وصول کرنے اور منشیات فروشی جیسے سنگین جرائم میں ملوث ہے۔

بتایا گیا ہے کہ 21 ستمبر 2021ء کو ایس ایس پی ہیڈ کوارٹرز ساؤتھ عرفان زمان نے حریم شاہ کے شوہر بلال شاہ کیخلاف تفتیش شروع کی اور اسے شوکاز نوٹس بھی بھیجے گئے لیکن اس نے کسی کا جواب دینا گوارا نہیں کیا، اس لئے حکام نے ایکشن لیتے ہوئے اسے نوکری سے برطرف کر دیا۔

پولیس ذرائع کا کہنا ہے کہ بلال شاہ کراچی کے علاقے قیوم آباد کی کچی آبادی میں پلا بڑھا۔تاہم کچھ مہینوں پہلے اس نے ڈیفنس کے مہنگے ترین علاقے میں گھر خرید لیا ہے۔ رپورٹ میں انکشاف کیا گیا ہے کہ بلال شاہ سندھ پولیس میں ڈیوٹی کے دوران بطور سپاہی بلاول ہاؤس میں تعینات رہا۔ اسی موقع پر اس نے کئی اہم سیاسی شخصیات کے ہمراہ اپنی تصویریں بنوائیں.پولیس حکام حیران ہیں کہ بلال شاہ ایک معمولی پولیس سپاہی تھا لیکن اس کے اخراجات شاہانہ کیسے ہیں؟ اس کے پاس مہنگی گاڑی، گھر، گھڑیاں اور دیگر چیزیں کیسے آئیں؟

پولیس ذرائع کا کہنا ہے کہ بلال شاہ کا بھائی بھی پہلے پولیس میں تھا لیکن منشیات فروشوں سے رابطوں کی وجہ سے اسے بھی برطرف کر دیا گیا تھا۔ اسے منشیات فروشی کے جرم میں گرفتار بھی کیا گیا تھا۔ دوسری جانب بلال شاہ نے پولیس رپورٹ میں لگائے گئے ان تمام الزامات کو مسترد کرتے ہوئے عدالت سے رجوع کر لیا ہے۔ اس کا کہنا ہے کہ میرا کسی سرکاری محکمے سے اب کوئی تعلق نہیں ہے اور میں شوقیہ پولیس میں بھرتی ہوا تھا۔

بلال شاہ کا کہنا تھا کہ اس پر لگائے تمام الزامات جھوٹے اور بے بنیاد ہیں اور وہ کبھی بلاول ہائوس میں تعینات نہیں رہا۔ بلال نے کہا کہ میرے پاس ویگو نہیں بلکہ اس سے بھی مہنگی گاڑیاں ہیں۔ میرا ڈیفینس میں ایک جم ہے اور یہی میرا ذریعہ روزگار ہے۔