عمران خان اور بشریٰ بی بی کو جیل میں کھانا نہ دینے کا بیان بے بنیاد ہے : عظمیٰ بخاری

وزیر اطلاعات پنجاب عظمیٰ بخاری نے کہا ہے کہ عمران خان اور بشریٰ بی بی کو جیل میں کھانا نہ دینے کا بیان من گھڑت اور بے بنیاد ہے۔

یاد رہے کہ مشیر اطلاعات خیبرپختونخوا بیرسٹر محمد علی سیف نے دعویٰ کیا تھا کہ عمران خان اور بشریٰ بی بی نہار منہ روزہ رکھ رہے ہیں۔

مشیر اطلاعات خیبرپختونخوا بیرسٹر سیف کے بیان پر ردعمل دیتےہوئے وزیر اطلاعات پنجاب عظمیٰ بخاری کا کہنا تھا کہ دونوں میاں بیوی کو معمول کے مطابق ان کے کھانے پینے کے لوازمات مہیا کیے جا رہے ہیں،جو شخص دوپہر 12 بجے اٹھتا ہو وہ روزہ کیسے رکھ سکتا ہے۔

وزیر اطلاعات پنجاب عظمیٰ بخاری نے کہاکہ عمران خان کو ہفتے میں 3 دن گوشت، دالیں، سبزیاں، ابلے ہوئے انڈے، چقندر کا جوس،کافی اور خشک میوے کھانے کو ملتے ہیں جب کہ  بشریٰ بی بی کا کھانے کو جو دل چاہتا وہ مہیا کیاجاتا ہے۔

عمران خان اور بشریٰ بی بی سحری و افطار میں کچھ نہ ملنے کے باعث نہار منہ روزہ رکھتے ہیں ، بیرسٹر سیف

ان کا کہنا تھاکہ پشاور میں بیٹھے ایک شخص کو خواب آیا ہے ان کے آ قا کو جیل میں کھانا نہیں مل رہا ۔

عظمیٰ بخاری نے کہاکہ 2 روز قبل ان کی جماعت کے ترجمان نے بھی عمران خان کی بیماری سے متعلق جھوٹ بولا،کل پمز کے 4 سینئر ڈاکٹروں کی ٹیم نے آدھا گھنٹہ عمران خان کا طبی معائنہ کیا اور ڈاکٹروں نے عمران خان کو مکمل صحت مند قرار دیا ہے۔

عظمیٰ بخاری کا کہنا تھا کہ جب اس جماعت کےپاس کوئی کارڈ نہیں بچتاتو وہ مظلومیت اور ہمدردی کارڈ کھیلنا شروع کر دیتے ہیں۔