سپریم کورٹ : 9 مئی کے ملزمان کی ضمانت منسوخی کی اپیلوں پر سماعت عید کے بعد تک ملتوی
سپریم کورٹ میں پنجاب حکومت کی استدعا پر 9 اور 10 مئی کے رواں اور آئندہ ہفتے مقرر تمام مقدمات ڈی لسٹ کردیے گئے جب کہ پنجاب حکومت کی اپیلوں پر سماعت اب عید کےبعد ہوگی۔
سپریم کورٹ میں چیف جسٹس یحییٰ آفریدی کی سربراہی میں 3 رکنی بینچ نے 9 مئی کےملزمان کی ضمانت منسوخی کی اپیلوں پر سماعت کی۔
پنجاب حکومت کے وکیل ذوالفقار نقوی نے عدالت کو بتایاکہ پنجاب حکومت نے مجھے 9 مئی مقدمات میں وکیل مقرر کیا ہے۔عدالت سے استدعا ہےکہ تیاری کےلیے وقت دیا جائے۔
اس پر چیف جسٹس یحییٰ آفریدی نے کہاکہ 9 مئی کے مقدمات تو کل اور پرسوں بھی مقرر ہیں،گزشتہ سماعتوں پر ایڈیشنل پراسکیوٹر پیش ہوکر وقت مانگتےرہے ہیں،آج آپ وقت مانگ رہےہیں، ایسے نہیں چلے گا،یہ کوئی ایک کیس نہیں 50 کے قریب اپیلیں ہیں۔
اس موقع پر پنجاب حکومت کے وکیل ذوالفقار نقوی نے کہاکہ رواں ہفتے کے مقدمات ملتوی کر دیں اور آئندہ ہفتے والوں کی تیاری کر کے آؤں گا،اس پر چیف جسٹس نے کہا کچھ اپیلیں کیس منتقلی سے متعلق بھی ہیں، کیس منتقلی کا معاملہ ختم ہو چکا،اس پر حکومت سے ہدایات لےلیں۔
بعد ازاں عدالت عظمیٰ نے پنجاب حکومت کی مہلت کی استدعا منظور کرلی جس کےبعد تمام مقدمات کی سماعت عید کے بعد ہوگی۔
آکسفورڈ یونیورسٹی کے مباحثے میں مجھے کامیابی ملی : احسن اقبال
واضح رہےکہ لاہور ہائی کورٹ نے 9 مئی کے ملزمان کی ضمانتیں منظور کی تھیں جس کے بعد پنجاب حکومت نے ضمانتیں منسوخ کرنے کےلیے سپریم کورٹ سے رجوع کر رکھا ہے۔
