اسٹیبلشمنٹ نے عمران خان کو 20 دسمبر تک رہائی کی نوید سنائی تھی : شیر افضل مروت

مرکزی رہنما پی ٹی آئی شیر افضل مروت نے دعویٰ کیا ہےکہ حکومت اور اسٹیبلشمنٹ نے عمران خان کو 20 دسمبر تک رہا کرنےکی نوید سنائی تھی۔

رہنما پی ٹی آئی شیر افضل مروت نے عمران خان اور کارکنوں کی جلد رہائی کا دعویٰ کرتےہوئے کہاکہ عمران خان کے ساتھ براہ راست بھی کئی مواقع پر رجوع کیاگیا۔

شیر افضل مروت نے یہ بھی دعویٰ کیاکہ حکومت اور اسٹیبلشمنٹ کے نمائندوں نے عمران خان کو 20 دسمبر تک رہائی کی نوید دی تھی۔

انہوں نے وضاحت کرتے ہوئے کہاکہ یہ پیش کش لےکر آنے والے وفاقی وزیر داخلہ محسن نقوی اکیلے نہیں تھے بلکہ حکومت اور اسٹیبلشمنٹ کے نمائندے بھی شامل تھے۔

اسٹیبلشمنٹ کے ساتھ رابطے ختم ہو چکے : بیرسٹر گوہر

عمران خان کی رہائی کےلیے حکومت اور اسٹیبلشمنٹ کی پیش کش سے متعلق شیر افضل مروت نے مزید انکشاف کیاکہ پہلے تجویز آئی تھی کہ عمران خان کو نتھیا گلی منتقل کیا جائے گا اور اس کےلیے گورنر ہاؤس کی صفائی بھی کردی گئی تھی لیکن نتھیا گلی منتقلی کی تجویز پی ٹی آئی نے مسترد کر دی۔

شیر افضل مروت نے کہاکہ عمران خان کے باہر آنے سے احتجاج کی شدت بڑھ جائے گی جب کہ مذاکراتی کمیٹی سے متعلق انہوں نے کہاکہ تحریری مطالبات پیش کرنے کےلیے انفرادی طور پر کوئی تیار نہیں ہے بلکہ عمران خان سے مشاورت کی جائے گی۔