سپریم کورٹ کے نئے ججز نے حلف اٹھا لیا

سپریم کورٹ میں چھ نئے مستقل ججز اور ایک قائم قام جج نے حلف اٹھا لیا، تمام 7 ججز سے چیف جسٹس پاکستان جسٹس یحییٰ آفریدی نے حلف لیا۔

سپریم کورٹ کے حلف اٹھانے والے 6 مستقل ججز میں جسٹس عامر فاروق،جسٹس اشتیاق ابراہیم، جسٹس شکیل احمد،جسٹس شفیع صدیقی، جسٹس صلاح الدین پنہور اور جسٹس ہاشم کاکڑ شامل ہیں۔

جسٹس میاں گل حسن اورنگزیب نے بھی بطور قائم مقام جج سپریم کورٹ اپنے عہدےکا حلف اٹھایا، چیف جسٹس آف پاکستان جسٹس یحییٰ آفریدی نے جسٹس میاں گل حسن اورنگزیب سے قائم مقام جج کے عہدے کا حلف لیا۔

سپریم کورٹ میں پہلی بار تقریب حلف برداری عدالتی احاطےکے سبزہ زار میں منعقد ہوئی،جس میں سپریم کورٹ اور ہائی کورٹ کے ججز صاحبان،اٹارنی جنرل،ججز کے اہل خانہ،پاکستان بار کونسل،سپریم کورٹ بار کونسل کے عہدیداران اور وکلا کی بڑی تعداد نے شرکت کی۔

علاوہ ازیں اسلام آباد ہائی کورٹ کے جسٹس سردار محمد سرفراز ڈوگر نے قائم مقام چیف جسٹس اسلام آباد ہائی کورٹ کا حلف اٹھالیا۔

ایوان صدر میں منعقدہ تقریب حلف برداری میں صدر مملکت آصف علی زرداری نے جسٹس سردار محمد سرفراز ڈوگر سے قائم مقام چیف جسٹس کے عہدےکا حلف لیا، جسٹس سردار محمد سرفراز ڈوگر نئے چیف جسٹس کی تعیناتی تک قائم مقام چیف جسٹس کےفرائض انجام دیں گے۔

قبل ازیں سندھ ہائی کورٹ کے جسٹس محمد جنید غفار نے قائم مقام چیف جسٹس کے عہدےکا حلف اٹھایا،گورنر ہاؤس کراچی میں منعقدہ تقریب حلف برداری میں گورنر سندھ کامران ٹیسوری نے جسٹس محمد جنید غفار سے قائم مقام چیف جسٹس کا حلف لیا۔

دریں اثنا پشاور ہائی کورٹ کے قائم مقام چیف جسٹس سید محمد عتیق شاہ نےبھی گورنر ہاؤس خیبرپختونخوا میں منعقدہ تقریب حلف برداری میں اپنے عہدےکا حلف اٹھالیا۔

گورنر خیبرپختونخوا فیصل کریم کنڈی نےجسٹس سید محمد عتیق شاہ سےان کے عہدےکا حلف لیا،اس موقع پر وزیر اعلیٰ خیبرپختونخوا علی امین گنڈاپور بھی موجود تھے۔

گوادر پورٹ آپریشنلائزیشن پلان  کیلئے کابینہ کمیٹی تشکیل

علاوہ ازیں، بلوچستان ہائی کورٹ کے قائم مقام چیف جسٹس محمد اعجاز سواتی بھی آج اپنے عہدے کا حلف اٹھائیں گے،تقریب حلف برداری گورنر ہاؤس بلوچستان میں منعقد ہوگی،جس میں گورنر بلوچستان قائم مقام چیف جسٹس محمد اعجاز سواتی سےحلف لیں گے۔