امریکا میں ہیموفیلیا بی کے علاج کیلئے مہنگی ترین دوا کی منظوری دی گئی

امریکا میں ہیموفیلیا بی کے علاج کے لیے ایک تھراپی کی منظوری دی گئی ہے جسے دنیا کی مہنگی ترین دوا بھی قرار دیا گیا ہے۔

میڈیا رپورٹس کے مطابق آسٹریلیا کی کمپنی سی ایس ایل نے اس جین تھراپی کو تیار کیا ہے جس کی قیمت 35 لاکھ ڈالرز (78 کروڑ پاکستانی روپے سے زائد) رکھی گئی ہے،یہ خون کے موروثی مرض کے لیے پہلی جین تھراپی ہے اور اس دوا کو بس ایک بار ہی استعمال کرنا ہوگا۔

رپورٹس کے مطابق ہیمو فیلیا بی ایک جینیاتی بیماری ہے جس میں خون کی جمنے یا بلڈ کلاٹ بننے کی صلاحیت متاثر ہوتی ہے،آسان الفاظ میں اس کے شکار افراد کا خون بہنا شروع ہوجائے تو اسے روکنا مشکل ہوجاتا ہے جبکہ سنگین کیسز میں اعضا اور جوڑوں سے بھی جریان خون ہوتا ہے،اس اثر کی روک تھام کے لیے ایسے انجکشن دیے جاتے ہیں جو بلڈ کلاٹ میں مدد فراہم کرتے ہیں۔

میڈ یا رپورٹس کے مطابق یو ایس فوڈ اینڈ ڈرگ ایڈمنسٹریشن نے اس کے استعمال کی منظوری دی اور کمپنی نے بتایا کہ یہ قیمت اس مالی بوجھ سے کم ہے جس کا سامنا ہیموفیلیا کے مریضوں کو ہوتا ہے۔