آصفہ بھٹو نے ترک صدر اور آصف زرداری کی گاڑی کیوں چلائی؟

دورہ پاکستان مکمل کر کے اپنے وطن واپس لوٹنے کے باوجود ترک صدرطیب ایردوان کے سوشل میڈیا پر خوب چرچے ہو رہے ہیں۔ ترک صدر کے دورہ پاکستان کے جہاں معاشی اثرات پر بحث جاری ہے وہیں طیب ایردوان کے دورے سے دونوں ممالک کے تعلقات نئی بلندیوں کو چھوتے دکھائی دے رہے ہیں۔ ایسے میں خاتون اول آصفہ بھٹو زرداری کی ترک صدررجب طیب ایردوان کے دورہ پاکستان پر ان کی گاڑی چلانے کی ویڈیو نے بھی سوشل میڈیا پر خوب دھوم مچا رکھی ہے۔

رجب طیب ایردوان آصفہ بھٹو کے ساتھ فرنٹ سیٹ پر بیٹھے جبکہ صدر مملکت آصف علی زرداری پیچھے والی نشست پر موجود تھے۔ آصفہ بھٹو نے یہ ویڈیو سماجی رابطوں کی سائٹ ایکس پر شیئر کرتے ہوئے لکھا کہ صدررجب طیب ایردوان کے دورے کے دوران ان کی گاڑی چلانا یاد گار لمحہ تھا۔

آصفہ بھٹو زرداری کا کہنا تھا کہ جب گاڑی چلا رہی تھی تو میرے ساتھ گاڑی میں 2 صدور تھے، یہ یادگار لمحہ کبھی نہیں بھولوں گی۔

آصفہ بھٹو کی ویڈیو پر صارفین مختلف تبصرے کر رہے ہیں۔ ایک صارف نے لکھا کہ آصفہ بھٹو عکسِ بے نظیر ہیں، یہ بی بی کی سیاست کا دوسرا جنم ہے۔

ڈاکٹر شمع جونیجو نے آصفہ بھٹو کی ویڈیو شیئر کرتے ہوئے لکھا کہ دنیا کو پاکستان کی جانب سے خواتین کے حقوق اور ان کی طاقتور حیثیت کے حوالے سے ایک بہت مضبوط پیغام گیا ہے۔

صحافی اجمل جامی نے خاتون اوّل آصفہ بھٹو اور ترک صدر رجب طیب ایردوان کی تصویر پر تبصرہ کرتے ہوئے لکھا کہ یہ خوبصورت اور قابل احترام تصویر ہے۔

عمران خان کی حامی ایک صارف نے آصفہ بھٹو کے ترک صدر کی گاڑی چلانے پر تبصرہ کرتے ہوئے لکھا کہ عمران خان نے ان سب کو پاگل کر دیا ہے۔

وقار ستی نے لکھا کہ یہ صرف ایک سواری نہیں، تعلقات کی نئی منزلوں کی علامت ہے۔ایوانِ صدر میں خاتون اول آصفہ بھٹو زرداری ترک صدر رجب طیب اردوان کے تحفے میں دی گئی الیکٹرک گاڑی چلاتے ہوئے۔

واضح رہے کہ ترک صدر رجب طیب ایردوان پاکستان کا دورہ مکمل کر کے وطن واپس روانہ ہوگئے ہیں۔ وزیر اعظم محمد شہباز شریف کی دعوت پر ترکیہ کے صدر رجب طیب ایردوان نے پاکستان کا 2 روزہ دورہ کیا تھا۔ دورہ کے دوران وزیراعظم شہباز شریف اور صدر رجب طیب ایردوان نے پاک ترک اعلیٰ سطحی اسٹریٹجک کوآپریشن کونسل کے ساتویں اجلاس کی مشترکہ صدارت کی۔سیشن کے اختتام پر ایک مشترکہ اعلامیہ جاری کیا گیا اور 24 اہم معاہدوں ایم او یوز پر دستخط کیے گئے۔ ترک صدر رجب طیب ایردوان نے صدر مملکت آصف علی زرداری اور وزیراعظم شہباز شریف کو ترکیہ میں تیار کی گئی الیکٹرک گاڑی ’ٹوگ‘ کا تحفہ بھی دیا تھا تین ایشیائی ممالک کے دورے پر نکلے ترک صدر اردوان نے پاکستان کے اپنے 2 روزہ دورے کے دوران اسلام آباد میں ٹی10 ایکس ماڈل کی اسپورٹس یوٹیلیٹی وہیکل ’ٹوگ‘ وزیر اعظم شہباز شریف کو تحفے دیتے ہوئے سبز رنگ کی گاڑی کے سامنے تصویر بھی کھنچوائی تھی۔