معروف ماڈل فروا کاظمی نے شوبز دنیا کو الوداع کہہ دیا

2015 میں بولڈ ماڈلنگ شوٹز سے اپنا شوبز کیرئیر شروع کرنے والی ماڈل فروا کاظمی نے اچانک ماڈلنگ کو الوداع کہنے کا فیصلہ کیا ہے، فروا نے 2015 سے 2019 تک مختلف برانڈز کے ساتھ کام کیا اور خوب شہرت حاصل کی۔
فروا کاظمی نے متعدد دیدہ زیب ملبوسات کی تشہیری مہمات میں حصہ لیا اور مختلف منصوبوں کا حصہ بھی رہیں، تاہم گزشتہ برس سے انہیں ماڈلنگ کی دنیا میں کم دیکھا گیا، اب معلوم ہوا ہے کہ ان کی کایا پلٹ گئی ہے، انہوں نے شوبز دنیا کو چھوڑنے کا فیصلہ کیا ہے۔ ماڈل نے سوشل میڈیا سے اپنی پرانی تصویریں ہٹا کر صرف حجاب والی تصاویر شیئر کرنا شروع کر دیں۔
فروا کاظمی کی جانب سے پرانی تصاویر کو ہٹائے جانے اور صرف حجاب کے ساتھ تصاویر کو شیئر کرنے کے بعد چہ مگوئیاں تھیں کہ انہوں نے ماڈلنگ اور فیشن کی دنیا سے کنارہ کشی اختیار کرلی، تاہم اس حوالے سے کوئی بیان جاری نہیں کیا گیا تھا۔
فروا کاظمی گزشتہ کچھ عرصے سے مقدس مقامات کی زیارت کی تصاویر اور ویڈیوز بھی شیئر کرتی رہیں، جس پر بھی لوگوں نے خیال ظاہر کیا کہ انہوں نے اپنے بدلے ہوئے عقائد کی وجہ سے شوبز سے دوری اختیار کرلی، تاہم اس کے باوجود ماڈؒل نے کوئی جواب نہیں دیا تھا لیکن اب شوبز اور فیشن انڈسٹری سے کنارہ کشی کی تصدیق کرتے ہوئے انہوں نے بتایا کہ وہ اپنی مرضی سے شوبز انڈسٹری سے دور ہو گئی ہیں۔
حال ہی میں فروا کاظمی نے انسٹاگرام پر مداحوں کے سوالوں کے جوابات دیتے ہوئے تصدیق کی کہ انہوں نے ماڈلنگ انڈسٹری چھوڑ دی ہے اور یہ کہ کسی دوسرے کے کہنے پر نہیں بلکہ اپنی مرضی سے فیشن اور ماڈلنگ سے دوری اختیار کی ہے، فروا نے ایک مداح کے سوال کا جواب دیتے ہوئے کہا کہ وہ کافی عرصے سے نئی دنیا کو کھوجنا چاہتی تھیں، اس لیے شوبز سے دوری اختیار کرلی، ایک اور سوال کے جواب میں بتایا کہ ان کے پاس شوبز کو چھوڑنے کے بہت سارے جواز ہیں مگر مختصر جواب یہ ہے کہ وہ ماڈلنگ میں آنے کے دو سے تین سال بعد ہی اسے چھوڑنا چاہتی تھیں مگر کوششوں کے باوجود ایسا نہ ہو سکا تھا۔
ماڈل نے بتایا کہ انہوں نے کالج کے زمانے میں شوق کی خاطر ماڈلنگ شروع کی جو آگے چل کر انکا پیشہ بن گئی، وہ کمائی بھی کرنے لگیں لیکن پھر جلد انہیں احساس ہوا کہ انکی زندگی کا مقصد کچھ اور ہے، اس لیے اب وہ شوبز کی دنیا سے دور ہو گئی ہیں۔
اپنا بولڈ لباس چھوڑ کر حجاب پہن لینے کے حوالے سے پوچھے گئے ایک سوال کے جواب میں فروا کاظمی نے بتایا کہ وہ زیارت کے لیے ایک مقدس مقام گئی تھیں، جہاں ہر کسی نے ادب و احترام سے سر ڈھانپ رکھے تھے، اس لیے میں نے بھی ایسا کیا اور پھر وہاں سے واپس آنے کے بعد حجاب اتارنا مناسب نہ سمجھا۔
ان کا کہنا ہے کہ اب انہیں حجاب میں مزہ آنے لگا ہے، فروا کاظمی نے ایک سوال کے جواب میں بتایا کہ ان کے سسرال والے سیکولر ذہنیت کے مالک ہے جو دوسروں کے کام میں مداخلت نہیں کرتے، اس لیے ان کے لباس پر بھی وہ کوئی مداخلت نہیں کرتے، انہون نے کہا کہ انکے سسرال والوں نے نہ تو پہلے ان کے لباس پر کوئی اعتراض کیا تھا اور نہ اب ان کے لباس پر انہیں کوئی اعتراض ہے۔
بعض سوشل میڈیا صارفین نے ماڈل کو یاد دلایا کہ وہ کالج کے زمانے میں مذہبی لباس پننے والے دوسرے کلاس فیلوز پر طنز کرتی تھیں مگر اب وہ خود مذہبی لباس پہن رہی ہیں، جس پر ان کے تمام پرانے کلاس فیلوز بہت خوش ہیں۔
خیال رہے کہ فروا علی کاظمی نے میر علی احمد کے ساتھ چند سال قبل شادی کی تھی، انہوں نے یکم جنوری 2021 کو انکشاف کیا تھا کہ انکا سات ماہ کا حمل ضائع ہو گیا، فروا نے حمل ضائع ہونے پر افسوس کا اظہار کرتے ہوئے بتایا کہ ان کی اور ان کے شوہر کی شدید خواہش تھی کہ ان کے ہاں بچے کی پیدائش ہو لیکن شاید اللہ کو منظور نہیں تھا۔