کنا یاری فیم حجابی گلوکارہ ایوابی کی شادی کے چرچے

کوک سٹوڈیو کے گانے ’’کنا یاری‘‘ سے شہرت حاصل کرنے والی بلوچ اداکارہ ’’ایوا بی‘‘ پیا گھر سدھار گئی ہیں، ایوا بی نے شادی کے موقع پر روایتی بلوچ عروسی جوڑا زیب تن کر رکھا تھا۔حجاب پہن کر سٹیج پر سُر بکھیرنے والی بلوچی ریپر کی ویڈیوز اور تصاویر سوشل میڈیا پر وائرل ہو رہی ہیں جس میں گلوکارہ کو لال رنگ کا بلوچی دلہن کا روایتی عروسی لباس زیب تن کئے دیکھا جا سکتا ہے، تاہم ہمیشہ کی طرح ان ویڈیوز اور تصاویر میں بھی ایوا بی نے مہندی لگے ہاتھوں سے اپنا چہرہ چُھپا رکھا ہے۔

ایوا بی نے دسمبر 2022 میں گلوکار و سوشل میڈیا سٹار مدثر قریشی سے خاموشی سے منگنی کرلی تھی، گلوکارہ نے سوشل میڈیا پوسٹ کے کیپشن میں منگنی سے متعلق کوئی بات نہیں لکھی تھی، البتہ انہوں نے انگوٹھی کی تصاویر اور منگنی کے کیک کی تصاویر شیئر کی تھی۔ایوا بی نے شادی کی تصاویر اور ویڈیوز کو شیئر کرتے ہوئے کیپشن میں خدا کے شکرانے ادا کیے، تاہم انہوں نے واضح طور پر نہیں بتایا کہ انہوں نے صرف نکاح کیا یا ان کی رخصتی بھی ہوگئی، گلوکارہ نے نکاح نامے پر دستخط کرنے کی ویڈیو بھی شیئر کی، جس میں ان کے ہاتھ دستخط کرتے وقت کانپتے دکھائی دیتے ہیں۔

علاوہ ازیں انہوں نے سرخ و سفید رنگ کے عروسی لباس کے ساتھ تصاویر بھی شیئر کیں اور انہیں اپنے شریک حیات مدثر قریشی کے ساتھ خوشگوار موڈ میں دیکھا جا سکتا ہے، ایوا بی کی شادی کے حوالے سے ان کا میک اپ کرنے والے آرٹسٹ وقار احمد نے بھی گلوکارہ کے دلہن کے روپ کی ویڈیوز شیئر کیں، جن میں انہیں سرخ رنگ کے بلوچی روایتی لباس میں دیکھا جا سکتا ہے۔میک اپ آرٹسٹ نے بھی ایوا بی کی دلہن کے روپ کی متعدد ویڈیوز شیئر کیں مگر انہوں نے واضح طور پر نہیں بتایا کہ گلوکارہ نے صرف نکاح کیا یا ان کی رخصتی بھی ہوگئی، میک اپ آرٹسٹ اور ایوا بی کی جانب سے شیئر کی جانے والی ویڈیوز اور تصاویر سے عندیہ ملتا ہے کہ گلوکارہ کی رخصتی بھی ہوگئی۔ایوا بی کے دلہن بننے پر مداحوں نے انہیں مبارک باد پیش کی، تاہم ساتھ ہی مداحوں نے ان سے مزاحیہ انداز میں پوچھا کہ نکاح نامے پر دستخط کے وقت ان کے ہاتھ کیوں کانپ رہے ہیں؟

واضح رہے کہ ایوا بی کے ’کوک اسٹوڈیو سیزن 14‘ کے گانے ’کنا یاری‘ کو ملک بھر میں بہت پسند کیا گیا تھا اور وہ گانے کی وجہ سے عالمی سطح پر بھی مشہور ہوئی تھیں تاہم ایوا بی نے گلوکاری کا آغاز پہلے ہی کردیا تھا، انہوں نے تین سال قبل 2018 میں انسٹاگرام پراپنا پہلا ریپر گانا شیئر کیا تھا، جسے کافی سراہا گیا تھا۔ایوا بی نے کیریئر کے آغاز میں ہی نہ صرف اپنے بلوچ ثقافتی لباس کو پہننا شروع کیا بلکہ انہوں نے مکمل حجاب کرنا بھی شروع کیا اور اسی وجہ سے ان کی مقبولیت میں اضافہ دیکھنے کو ملا، انہیں ان کے حجاب اور ثقافتی و دیدہ زیب لباس پہننے کی وجہ سے منفرد اہمیت حاصل ہے۔

ان کے ریپ گانے کو رواں برس ریلیز ہونے والی پہلی مسلم سپر ہیرو امریکی ویب سیریز ’مس مارول‘ میں بھی شامل کیا گیا تھا، ایوا بی نے سیزن 14 میں ’کنا یاری‘ریکارڈ کرتے ہوئے کوک اسٹوڈیو کو بتایا تھا کہ انہیں پہلے تو ’ریپنگ‘ موسیقی اور گلوکاری کا کچھ پتہ ہی نہیں تھا مگر جب انہوں نے پہلی بار امریکی ریپر ایمینم کو سنا تو انہیں ایسے ہی گیت لکھنے کا شوق ہوا۔ان کا کہنا تھا کہ اب وہ حجاب کی اتنی عادی ہو چکی ہیں کہ اگر ان سے حجاب واپس لیا جائے تو وہ گلوکاری ہی نہیں کر سکیں گی، ’کنا یاری‘ گلوکارہ نے بتایا تھا کہ وہ حجاب میں خود کو پرسکون اور محفوظ تصور کرتی ہیں اور انہیں اس کے ساتھ ہی ریپنگ گلوکاری میں مزہ آتاہے۔

Related Articles

Back to top button