یوم تکبیر قوم کے اتحاد اور خود مختاری پر سمجھوتہ نہ کرنے کے اعلان کا دن ہے صدر، وزیر اعظم
یوم تکبیر کے موقع پر پیغام جاری کرتے ہوئے صدر مملکت آصف علی زرداری اور وزیر اعظم شہباز شریف نے کہا کہ یوم تکبیر قوم کے اتحاد،آزادی اور خود مختاری پر سمجھوتہ نہ کرنے کے اعلان کا دن ہے۔آج کے دن ہم نے اپنی جوہری صلاحیتوں کا مظاہرہ کیا، آج کے دن ہم نے تزویراتی دفاعی طاقت حاصل کی۔
پاکستان کے ایٹمی تجربات کو آج 27 برس مکمل ہوگئے ہیں اور قوم آج 28 مئی کو یومِ تکبیر ملی جوش و جذبے سے منارہی ہے۔یوم تکبیر پر آج ملک بھر میں عام تعطیل ہے،وطن کے رکھوالوں کو سلام پیش کیا جارہا ہے۔
یوم تکبیر کے موقع پر پیغام جاری کرتے ہوئے وزیر اعظم شہباز شریف نے کہاکہ پاکستان کو دنیا کی ساتویں ایٹمی قوت بنے 27 سال مکمل ہوگئے،پاکستان اس مرتبہ یوم تکبیر ایک اہم اور تاریخی موقع پر منارہا ہے۔
وزیر اعظم شہباز شریف نے کہاکہ پاکستان اللہ کے فضل و کرم سے 6 تا 10 مئی کے معرکہ حق میں فتح یاب ہوا،بھارت کی مسلط کردہ جنگ میں سرخرو ہوکر نکلے ہیں،فتح مبین سے سرشار قوم کےلیے یوم تکبیر کی مسرتوں میں مزید اضافہ ہوگیا۔
انہوں نے کہاکہ مئی 1998 میں بھارت نے 5 ایٹمی دھماکے کر کے ہماری سلامتی،دفاع اور خودمختاری کو چیلنج کیاتھا، وزیر اعظم نواز شریف نے 6 دھماکے کرکے پاکستان کو ایٹمی طاقت بنایا، اس وقت نواز شریف نے قوم کی امنگوں،مفادات کی ترجمانی کی، نواز شریف اقتصادی پابندیوں،دباؤ،دھمکیوں اور لالچ کو خاطر میں نہ لائے، نواز شریف نے ملک کی جغرافیائی سرحدوں کو ہمیشہ کےلیے ناقابل تسخیر بنا دیا۔
وزیر اعظم کاکہنا تھاکہ چاغی کے پہاڑوں سے اللہ اکبر کی صدا آج بھی پاکستانی قوم کا عہد بن کر گونج رہی ہے،یہ ہی شاندار روایت بھارت کے حالیہ بلاجواز حملوں کےخلاف قوم نے ایک مرتبہ پھر دہرائی۔
وزیراعظم شہباز شریف نے جوہری پروگرام کےلیے بےپناہ قربانیاں دینے پر قوم، سابق وزیراعظم ذوالفقار علی بھٹو،ڈاکٹر عبدالقدیر خان،سائنسدانوں اور انجینئرز کو سلام پیش کیا۔
وزیر اعظم نے افواج پاکستان،قومی اداروں اور ایٹمی پروگرام میں حصہ ڈالنے والے معماروں کو بھی سلام پیش کرتےہوئے کہاکہ جوہری اثاثوں کی بھرپور حفاظت کرنے پر مسلح افواج کو بھی خراج تحسین پیش کرتاہوں۔
وزیر اعظم نے کہاکہ یوم تکبیر قوم کے اتحاد،آزادی اور خود مختاری پر سمجھوتہ نہ کرنے کے اعلان کا دن ہے۔
صدر آصف علی زرداری نے اپنے پیغام میں کہاکہ یوم تکبیر پر قوم کو دلی مبارکباد پیش کرتا ہوں،آج کے دن ہم نے اپنی جوہری صلاحیتوں کا مظاہرہ کیا،آج کے دن ہم نے تزویراتی دفاعی طاقت حاصل کی۔
صدر آصف علی زرداری نے کہاکہ آج ہم ملکی خود مختاری،علاقائی سالمیت کے تحفظ کا عزم کرتےہیں، ایٹمی پروگرام سے منسلک سائنسدانوں،انجینئرز، سول اور فوجی قیادت کو خراج تحسین پیش کرتےہیں۔
صدر مملکت نے پاکستان کے ایٹمی پروگرام کی بنیاد رکھنےپر شہید ذوالفقار علی بھٹو کو خراج عقیدت پیش کیا اور کہاکہ ایٹمی طاقت بننا محض ہماری تکنیکی ترقی کا مظہر نہیں تھا،ایٹمی طاقت کا حصول قوت کے ذریعے امن قائم رکھنے کا دانشمندانہ فیصلہ تھا۔
صدر زرداری کاکہنا تھاکہ بدلتی علاقائی سلامتی کی صورت حال میں ہماری جوہری طاقت ایک قابل اعتبار کم از کم دفاعی صلاحیت ہے، پاکستان کی ایٹمی صلاحیت امن کی ضامن ہے،ایٹمی قوت ہماری خودمختاری اور قومی سلامتی کو یقینی بناتی ہے۔
اس کے علاوہ انہوں نے کہاکہ پاکستان جنگ کا خواہاں نہیں،پاکستان پر امن بقائے باہمی اور عالمی قوانین کے احترام کے اصولوں پر کاربند ہے،یومِ تکبیر پر ایک بار پھر عہد کریں کہ ملکی خود مختاری اور علاقائی سالمیت کا تحفظ کریں گے۔
