عثمان مرزا سمیت 7 ملزموں کے جوڈیشل ریمانڈ میں 27 اگست تک توسیع
اسلام آباد کی مقامی عدالت نے جوڑے کے ساتھ جنسی تشدد کیس کے ملزم عثمان مرزا سمیت 7 ملزموں کے جوڈیشل ریمانڈ میں 27 اگست تک توسیع کر دی ہے ، عثمان مرزا سمیت دیگر سات ملزموں کو آج کچہری کے بخشی خانہ میں لایا گیا تھا ، اس موقع پر ملزموں کو حاضری لگانے کے بعد عدالت میں پیش کرنے کی بجائے اڈیالہ جیل روانہ کر دیا گیا ۔
پولیس کی جانب سے ملزمان کو 14 روزہ جوڈیشل ریمانڈ مکمل ہونے پر کچہری لایا گیا تھا۔یاد رہے کہ گذشتہ عماعت پر عدالت نے حکم دیا تھا کہ پولیس 10 ستمبر تک مقدمے کا حتمی چالان عدالت میں جمع کرائے۔
اس سے قبل گذشتہ ماہ تفتیشی افسر کی جانب سے عدالت کو بتایا گیا کہ ملزمان نے وقتا فوقتا متاثرہ لڑکے اور لڑکی سے 11 لاکھ 25 ہزار روپے بلیک میلنگ کر کے لیے ہیں۔
یہ متاثرہ لڑکے کے گھر بندے بھیج کر پیسے منگواتے اور آپس میں بانٹ دیتے تھے جبکہ واقعے کے وقت بھی جو رقم چھینی گئی وہ ملزم ادریس کے گھر سے برآمد کر لی گئی۔ دوران تفتیش ملزمان نے کہا ہے کہ وہ 11 لاکھ 25 ہزار روپے واپس دینے کو تیار ہیں۔
