شیخ رشید کی منحرف اراکین سے واپس آنے کی اپیل

وفاقی وزیر داخلہ شیخ رشید نے منحرف اراکین سے واپس آنے کی اپیل کر دی ہے. میڈیا رپورٹس کے مطابق وزیر داخلہ نے کہا ہے کہ اپنے ضمیر کا سودا کرنے والے اراکین اسمبلی واپس آ جائیں ان کو کچھ نہیں کہا جائے گا. انہوں نے کہا کہ اگر منحرف ممبران اسمبلی واپس آ جاتے ہیں تو ہم سندھ ہاوس میں داخل نہیں ہوں گے. اسلام آباد میں میڈیا سے گفتگو کرتے ہوئے وزیر داخلہ نے کہا کہ اپوزیشن نے سندھ ہاوس کو اسٹاک ایکسچینج بنا دیا ہے جہاں ہارس ٹریڈنگ کا بازار گرم ہے. وزیر داخلہ نے سندھ میں گورنر راج کے حوالے سے بات کرتے ہوئے کہا گورنر راج لگانے کا فیصلہ نہیں ہوا. یاد رہے کہ گزشتہ روز جب حکمران جماعت کے منحرف اراکین منظر عام پر آنا شروع ہوئے تھے تو سب سے پہلے وفاقی وزیر داخلہ شیخ رشید نے ہی سندھ میں گورنر راج لگانے کی تجویز دی تھی تاہم بعد میں تحریک انصاف کے رہنماوں نے یہ کہا کہ سندھ میں گورنر راج کا حتمی فیصلہ وزیر اعظم کے ساتھ مشاورت کے بعد ہی ہوگا. تازہ صورت حال کے مطابق بنی گالہ میں پارلیمانی کمیٹی کے اجلاس میں وزیر اعظم عمران خان نے سندھ میں گورنر راج نہ لگانے کا فیصلہ کیا ہے.