ڈرامہ ارطغرل غازی کا ہیرو پاکستان کب آرہا ہے؟

پاکستان میں مقبولیت کی بلندیوں کو چھونے والے ڈرامہ سیریل ارطغرل غازی کی ہیروئن حلیمہ سلطان کے بعد ڈرامے میں ہیرو کا کردار ادا کرنے والے ارطغرل غازی نے بھی جلد دورہ پاکستان کی خواہش کا اظہار کر دیا ہے۔ ترکی سے پاکستانیوں کیلئے محبت بھرا پیغام دیتے ہوئے رانجن التان دوزیاتن المعروف ارطغرل نے کہا یے کہ مجھے پاکستان سے محبت ہے، ہمارا ڈراما دیکھنے کے لیے آپ سب کا شکریہ، امید ہے میں جلد آپ سب سے ملنے کے لیے پاکستان آؤں گا۔
ترکی کا مقبول ترین ڈراما وزیراعظم عمران خان کی ہدایت پر یکم رمضان المبارک سے پاکستان کے سرکاری ٹی وی چینل پر اردو میں ڈب کرکے ’’ارطغرل غازی‘‘ کے نام سے پیش کیاجارہا ہے۔ ڈرامے کی بہترین کہانی، عمدہ اداکاری اور جاندار مکالموں نے پاکستانیوں کو اپنا دیوانہ بنا لیا ہے اور صرف چند ہی دنوں میں ارطغرل کے پاکستان میں لاکھوں مداح بن گئے ہیں۔ تاہم سب سے زیادہ جن اداکاروں کی تعریفیں ہورہی ہیں وہ ڈرامے کے مرکزی اداکار ارطغرل غازی یعنی انجن التان دوزیاتن اور ان کی اہلیہ کا کردار ادا کرنے والی اداکارہ حلیمہ سلطان یعنی اسریٰ بلجک ہیں۔
پاکستانی تو ان دونوں کی اداکاری کے سحر میں مبتلا ہوگئے ہیں اور دونوں کے سوشل میڈیا اکاؤٹنس پرمسلسل ان سے اپنی محبت کا اظہار کررہے ہیں۔ تاہم ایسا نہیں ہے کہ محبتوں کے اظہار کا یہ سلسلہ یک طرفہ ہے بلکہ ڈرامے کے کئی اداکاروں نے پاکستانیوں کی محبت کا جواب دیتے ہوئے ڈراما پسند کرنے پر شکریہ اداکیا ہے۔ڈرامے کے ہیرو اور پاکستانیوں کے ہر دلعزیز اداکار انجن التان دوزیاتن نے انسٹاگرام پر پاکستانیوں کے لیے محبت بھرا پیغام دیتے ہوئے کہا’’مجھے پاکستان سے محبت ہے، امید ہے میں جلد آپ سب سے ملنے کے لیے پاکستان آؤں گا۔
پاکستانی ڈراما مداحین ‘ارطغرل غازی’ اور ‘حلیمہ سلطان’ کے سوشل میڈیا اکاؤنٹس پر ان کی تعریف میں کمنٹس کر رہے ہیں اور ان سے ملنے اور انہیں پاکستان آنے کی دعوت دیتے دکھائی دیتے ہیں۔ چند روز قبل ڈرامے میں حلیمہ سلطان کا کردار اداکرنے والی اسریٰ بلجک نے بھی ایک پاکستانی مداح کے پیغام کا جواب دیتے ہوئے کہا تھا کہ وہ بھی پاکستانی مداحوں سے ملنے کے لیے بے تاب ہیں۔ وہ جوش و خروش سے انتظار کررہی ہیں کہ پاکستان آکر اپنے مداحوں سے ملاقات کرسکیں۔
حلیمہ سلطان کے بعد اسی ڈرامے کے دو معروف اداکاروں دوآن بے (روشان) کا کردار ادا کرنے والے جاوید چتین گونر اور اصلحان خاتون کا کردار ادا کرنے والی گلثوم علی نے بھی پاکستان آنے کی خواہش کا اظہار کیا تھا۔جاوید چتین گونر نے ایک انٹرویو میں اپنی خواہش کا اظہار کرتے ہوئے کہا تھا کہ وہ پاکستان سے ملنے والی محبت کے مشکور ہیں اور انہیں اس بات کی خوشی ہے کہ پاکستان میں ان کے ڈرامے کو اتنا سراہا جا رہا ہے۔ ایک سوال کے جواب میں انہوں نے کہا کہ پاکستان ان کے لیے دوسرا گھر ہے۔ ان کی طرح ڈرامے کی اداکارہ گلثوم علی نے بھی اپنی سوشل میڈیا پوسٹ کے ذریعے پاکستان آنے کی خواہش کا اظہار کیا تھا۔گلثوم علی نے سوشل میڈیا پر پاکستانی مداحوں کا شکریہ ادا کرتے ہوئے لکھا کہ وہ اس بات پر بہت خوش ہیں کہ پاکستان میں ان کے ڈرامے کو اتنے شوق سے دیکھا جا رہا ہے اور انہیں اس بات کی بھی امید ہے کہ ایک دن وہ ضرور پاکستان آ کر مداحوں سے ملیں گی۔
واضح رہے کہ ارطغرل‘ ڈرامے کی کہانی 13ویں صدی میں ’سلطنت عثمانیہ‘ کے قیام سے قبل کی ہے اور اس ڈرامے کی مرکزی کہانی ’ارطغرل‘ نامی بہادر مسلمان سپہ سالار کے گرد گھومتی ہے جنہیں ’ارطغرل غازی‘ بھی کہا جاتا ہے۔ڈرامے میں دکھایا گیا ہے کہ کس طرح 13ویں صدی میں ترک سپہ سالار ارطغرل نے منگولوں، صلیبیوں اور ظالموں کا بہادری سے مقابلہ کیا اور کس طرح اپنی فتوحات کا سلسلہ برقرار رکھا۔ڈرامے میں سلطنت عثمانیہ سے قبل کی ارطغرل کی حکمرانی، بہادری اور محبت کو دکھایا گیا ہے۔ ’’ارطغرل‘‘ میں ترک مسلمانوں کی تیرہویں صدی میں کی جانے والی فتوحات کے واقعات بیان کئے گئے ہیں۔’’ارطغرل غازی‘‘ پی ٹی وی سے پہلے دنیا کی 60 مختلف زبانوں میں نشر ہو چکا ہے۔ مجموعی طور پر اس کی 179 قسطیں ہیں اور یہ پہلی مرتبہ 2014 میں ترکی کے سرکاری چینل سے نشر ہوا تھا۔