ائیرپورٹس کھولنے اورٹرین آپریشن شروع کرنے کی بات درست نہیں

قومی سلامتی کے مشیر معید یوسف نے واضح کیا ہے کہ5 اپریل سے ائیرپورٹس کھولنے یا ٹرین آپریشن شروع کرنے کی بات درست نہیں، آہستہ آہتسہ انٹرنیشنل فلائٹ آپریشن بحال کریں گے، اندرون ملک بھی تمام پروازیں بند ہیں اور بند رہیں گی، دنیا میں کہیں پاکستانی مسافر نہیں پھنسے ہوئے، تھائی لینڈ سے آنے والے تمام مسافر کورونا کلیئر ہیں۔
انہوں نے معاون خصوصی برائے صحت ڈاکٹر ظفر مرزا اور چیئرمین این ڈی ایم اے لیفٹیننٹ جنرل محمد افضل کے ہمراہ پریس کانفرنس کرتے ہوئے بتایا کہ پروازوں کی بحالی سے متعلق غور ہو رہا ہے ابھی کوئی فیصلہ نہیں ہوا۔یہ بات درست نہیں کہ 4 اپریل کے بعد تمام ایئرپورٹس پر پروازیں بحال ہوجائیں گی۔ 5 اپریل سے ائیرپورٹ کھولنے کی بات درست نہیں۔ اندرون ملک بھی تمام پروازیں بند ہیں اور بند رہیں گی۔ انہوں نے کہا کہ دنیا کے کسی ایئرپورٹ پر پاکستانی مسافر پھنسے ہوئے نہیں ہیں۔تھائی لینڈ سے تمام مسافر واپس آچکے ہیں،یہ تمام مسافرکلیئر ہیں۔ انھوں نے مزید کہا کہ ملک میں مسافر ٹرینوں کا آپریشن بند ہے اور تا حکم ثانی بند رہے گا. اس موقع پر معاون خصوصی برائے صحت ڈاکٹر ظفر مرزا نے کہا کہ پاکستان میں گزشتہ 24 گھنٹوں میں 99 کورونا کیسز سامنے آئے، ملک میں 24 گھنٹوں میں کورونا کیسز کی تعداد گزشتہ روزسے کم ہیں۔ اسی طرح 5 اموات ہوئیں۔ جس کے ساتھ ملک بھر میں کورونا مریضوں کی تعداد 1625ہوگئی ہے۔
ابھی تک 21 اموات ہوچکی ہیں۔ پاکستان میں32 افراد صحت یاب ہوچکے ہیں۔ ہسپتالوں میں 783 میں سے 773 افراد کی حالت بہترہے جلد صحت یابی متوقع ہے۔ آنے والے دنوں میں صحت یاب ہونے والوں کی تعداد میں اضافہ ہوگا۔ اسی طرح ہسپتالوں میں 10 کی حالت تشویشناک ہے۔ انھوں نے مزید کہا کہ ملک میں لوکل ٹرانسمیشن کرونا کیسز میں اضافہ خطرناک ہے، عوام کو اس حوالے سے ذمہ داری کا مظاہرہ کرنا ہو گا. اس موقع پر چیئرمین این ڈی ایم اے لیفٹیننٹ جنرل محمد افضل نے کہا کہ اولین ترجیح میڈیکل ٹیموں کے لیے سامان کی فراہمی ہے۔گلگت بلتستان اور آزاد کشمیر کو5 ہفتوں کیلئے سامان دے دیا گیا ہے۔ سرگودھا کی لیبارٹریزکی ایوی لیوایشن جاری ہے، وہاں بھی ٹیسٹنگ شروع ہوجائے گی۔ سندھ حکومت کو20 ہزار، پنجاب کو5 ہزارٹیسٹنگ کٹس دی گئیں ہیں۔ پاکستان میں کورونا ٹیسٹنگ کی استعداد بڑھا رہے ہیں۔ اگلے تین دن میں 4 سے5 فلائٹس چین جائیں گی ۔ بیجنگ سے آنے والے سامان میں 100واک تھرو تھرمل اسکین ہیں۔ انہوں نے کہا کہ6 اپریل سے پہلے پہلے ایک لاکھ تک حفاظتی کٹس پہنچ جائیں گی۔ 1200 سے 1500 کے درمیان وینٹی لیٹرز ہمارے پاس موجود ہوں گے۔
یاد رہے اس سے قبل وزیر ریلوے شیخ رشید احمد نے کہا ہے کہ پہلے فیصلہ تھا یکم اپریل سے مسافر ٹرینیں کھول دیں لیکن اب ایسا نہیں ہوگا، تاحکم ثانی مسافر ٹرینیں بند رہیں گی۔تاہم فریٹ ٹرینیں چلتی رہیں گی تاکہ اشیائے خوردونوش کی سپلائی رہے. انھوں نے مزید کہا کہ پاکستان میں حالات کنٹرول میں ہیں، امریکا یا اٹلی جیسی صورتحال نہیں ہے، کرونا وائرس سے متعلق 15 دن بہت اہم ہیں۔انہوں نے کہا کہ کابینہ کے کل ہونے والے اجلاس میں اہم فیصلے ہوں گے، لوگوں کو امدادی رقم دینے سے متعلق بھی کل اہم فیصلے ہوں گے، کرفیو کی طرف نہیں جائیں گے، عوام خود احتیاط کریں۔