اداکارہ نیمل خاور خود کو خوش قسمت قرار کیوں دیتی ہیں؟

اداکارہ نیمل خاور نے انکشاف کیا ہے کہ وہ خوش نصیب ہیں کہ ان کو اداکار حمزہ علی عباسی جیسے شوہر ملے، کیونکہ ان کے اندر اللہ کا خوف ہے، حمزہ علی عباسی اور نیمل خاور خان 25 اگست 2019 کو شادی کے بندھن میں بندھے تھے، جوڑے کے ہاں ایک بیٹا بھی ہے۔شادی کے دو روز بعد خبر آئی کہ نیمل خاور نے اداکاری سے کناری کشی اختیار کرلی تھی، تاہم اب انہوں نے ایک بار پھر اداکاری کی دنیا میں واپس آنے کا اعلان کیا ہے۔نیمل خاور نے حال ہی میں اداکار اور میزبان عمران اشرف کے پروگرام ’’مذاق رات‘‘ میں شرکت کی اور بتایا کہ وہ محبت کے معاملے میں بہت خوش قسمت ہیں کہ انہیں حمزہ علی عباسی جیسا شوہر ملا، میں بہت خوش قسمت ہوں کہ میں نے اللہ سے جیسا شوہر مانگا تھا انہوں نے بالکل ویسا ہی نوازا۔اداکارہ نے کہا کہ شادی سے قبل وہ دعا کرتی تھیں کہ ان کی جس شخص سے شادی ہو اس میں اللہ کا خوف ہو جو آج کل کے زمانے میں لوگوں کے اندر نہیں ہے، پہلی ملاقات کے بارے میں بات کرتے ہوئے نیمل خاور نے کہا کہ ’پہلی ملاقات فلم ’ورنہ‘ کی شوٹنگ کے دوران ہوئی تھی، یہ صرف دو سیکنڈ کی ملاقات تھی پھر حمزہ نے مجھے کام کے سلسلے میں میسج کیا جس کے بعد وہ میری پینٹنگ کی نمائش پر آئے۔اداکارہ نے کہا کہ حمزہ نے مجھ سے پینٹنگ بنوانے کی فرمائش کی، میں ان سے صرف کام سے متعلق ہی بات کر رہی تھی، اب جب میں نے انہیں پینٹنگ بنا کر دے دی تو ہمارا رابطہ کچھ وقت کے لیے ختم ہوگیا، اس کے بعد وہ اعلیٰ تعلیم حاصل کرنے کے لیے بیرون ملک چلی گئی تھیں، کچھ ماہ بعد حمزہ نے میرے گھر رشتہ پھیجا، والد کے ساتھ مختصراً ملاقات ہوئی اور پھر رشتہ طے ہوگیا، ہم دونوں ہی دھیمے مزاج کے انسان ہیں، ہماری جب بھی لڑائی ہوتی ہے حمزہ جلدی صلح کرلیتے ہیں۔ایک سوال کے جواب میں اداکارہ نے لڑکیوں کو مشورہ دیا کہ ’زندگی میں ہمسفر کا انتخاب کرنے سے قبل اپنے اوپر محنت کریں، پڑھائی مکمل کریں، زندگی میں کچھ بن جائیں اور پھر جیون ساتھی کا انتخاب کریں، نیمل خاور نے کہا کہ وہ مستقبل میں اداکاری جاری رکھیں گی اور رومانوی ڈراما کرنے کی خواہش رکھتی ہیں۔یاد رہے کہ حمزہ علی عباسی نے 2020 میں ’مذہب کی تعلیم حاصل کرنے کے لیے‘ مختصر وقت کے لیے شوبز انڈسٹری سے کنارہ کشی اختیار کی تھی، بعدازاں حمزہ علی عباسی نے متعدد فلموں اور ڈراموں میں کام کیا اور حال ہی میں ان کا نیا ڈراما سیریل ’جانِ جہاں‘ جلد ہی اے آر وائے ڈیجیٹل پر نشر ہونے والا ہے جہاں وہ اداکارہ عائزہ خان کے ساتھ مرکزی کردار ادا کرتے دکھائی دیں گے۔