اشتعال انگیز تقریر اور پرچم کی بے حرمتی، علی وزیر کیخلاف مقدمہ درج
مبینہ اشتعال انگیز تقریر اور پرچم کی بے حرمتی کرنے پر رہنما پشتون تحفظ موومنٹ و رکن قومی اسمبلی علی وزیر کیخلاف مقدمہ درج کر لیا گیا ہے۔
چارسدہ ایس ایچ او کی مدعیت میں علی وزیر کیخلاف اشتعال انگیز تقریر اور پرچم کی بے حرمتی پر مقدمہ درج کیا گیا ہے۔ مقدمہ میں د فعہ 153، 120اے اور 121 اے کی دفعات شامل کی گئیں ہیں۔ مقدمے میں کہا گیا ہےکہ علی وزیر نے تقریر کے ذریعے سے لوگوں کو اشتعال دلانے کی کوشش کی۔ ساتھ ہی ساتھ ریاست اور ریاستی اداروں کے خلاف ہرزہ سرائی کی ۔علی وزیر نے ملک کو تباہ کرنے کے لئے امریکا کو اکسایا ۔
واضح رہے کہ چارسدہ میں ایک جلسے سے خطاب کے دوران علی وزیر نے کہاتھا کہ امریکا نے افغانستان کو تہس نہس کرکے پختونوں کو تباہ کردیا ۔اب جب تک امریکہ دہشت گردی کے اڈے جی ایچ کیو، اسلام آباد، لاہور، پنڈی کو تباہ نہیں کرے گا اسے پاکستان نہیں آنے دیں گے۔
علاوہ ازیں چارسدہ جلسے میں قومی پرچم لہراتے ”پاکستان زندہ باد “کے نعرے لگانے پر پی ٹی ایم کے کارکنوں نے نوجوان کو تشدد کا نشانہ بنانے کے ساتھ قومی پرچم کی بے حرمتی بھی کی۔ تشدد کے شکار نوجوان کی پولیس کو بروقت شکایت پر پرچم کی بے حرمت کرنے والے پی ٹی ایم کے دو کارکنوں کو گرفتار کرکے مقدمہ درج کر لیا گیا ہے ۔ گرفتار کئے جانے والے چارسدہ کے رہائشی نہیں بلکہ دیگر اضلاع سے پی ٹی ایم کے اہم رہنماوں کے ہمراہ آئے تھے۔ چیئرمین قائمہ کمیٹی برائے داخلہ رحمان ملک نے واقعہ کا نوٹس لیتے ہوئے کہا کہ پرچم کی بے حرمتی سے پاکستانیوں کی دل آزازی ہوئی۔ آئی جی خیبر پختونخوا واقعہ کی رپورٹ پیش کریں۔
