افغان حکومت، طالبان کا عید الاضحیٰ پر جنگ بندی کا اعلان
طالبان کی جانب سے عید الاضحیٰ کے موقع پر 3 دن کے لیے جنگ بندی کے جواب میں افغان حکومت نے بھی سیز فائر کا اعلان کردیا۔ افغان طالبان کے ترجمان ذبیح اللہ مجاہد نے ٹوئٹر پر مذکورہ پیش رفت سے متعلق آگاہ کیا۔
خیال رہے کہ طالبان کی جانب سے 2 ماہ میں دوسری مرتبہ جنگ بندی کا اعلان ہوا ہے۔
انہوں نے کہا کہ ‘عید الاضحیٰ کے مذہبی تہوار کے موقع پر طالبان کی جانب سے شدت پسند کارروائیاں نہیں کی جائیں گی’۔ ترجمان افغان طالبان نے واضح کیا کہ جنگ بندی کا آغاز جمعے کے روز سے شروع ہوگا جو 3 روز تک نافذ العمل ہوگا۔ انہوں نے جنگجوؤں کو ہدایت کی کہ وہ عید کے تین دن اور تین راتوں کے دوران ‘دشمن’ کے خلاف کارروائیوں سے گریز کریں۔
علاوہ ازیں ترجمان طالبان نے دھمکی دی کہ ‘اگر دشمن نے حملہ کیا تو جوابی کارروائی کی جائے گی’۔ دوسری جانب افغان صدر اشرف غنی کے ترجمان نے کہا کہ افغان حکومت نے تمام سکیورٹی فورسز کو سیز فائر کا حکم دے دیا۔ صدیق صدیقی نے کہا کہ ‘افغان حکومت، طالبان کی جانب سے عید الاضحیٰ پر جنگ بندی کے اعلان کا خیر مقدم کرتی ہے’۔ انہوں نے بتایا کہ تمام سکیورٹی فورسز کو ہدایت کی ہے کہ اگر طالبان کی جانب سے جنگ بندی کی خلاف ورزی کی گئی تو بھرپور جوابی کارروائی کی جائے’۔
د لوی اختر په شپو ورځو کې اوربند په اړه د اسلامي امارت اعلامیه
اعلامیه امارت اسلامی در مورد اعلان آتش بس در ایام عید اضحیhttps://t.co/UW8jH1Fhvs pic.twitter.com/bNuIxifcBo— Zabihullah (..ذبـــــیح الله م ) (@Zabehulah_M33) July 28, 2020
واضح رہے کہ طالبان اور افغان حکومت نے رمضان المبارک کے اختتام پر عیدالفطر کے موقع پر بھی 3 روزہ جنگ بندی کا اعلان کیا تھا۔
طالبان کی جانب سے جنگ بندی کا اعلان طالبان رہنما کے عیدالفطر کے پیغام کے بعد جاری کیا گیا تھا جس میں انہوں نے کہا تھا کہ وہ امن معاہدے پر قائم ہیں۔ بعدا زاں طالبان سے جنگ بندی کے تیسرے اور آخری روز اس میں توسیع کے مطالبے کے ساتھ افغان حکام نے سیکڑوں مزید طالبان قیدیوں کو رہا کردیا تھا۔ دوسری جانب افغان طالبان کے روپوش رہنما ملا ہیبت اللہ اخونزادہ نے بھی عید الاضحیٰ کے موقع پر اپنے پیغام میں کہا کہ ‘ہم اقتدار پر مکمل قبضہ نہیں کرنا چاہتے، ہمارا جہاد قبضے کو ختم کرنے اور ایک خالص اسلامی نظام کے قیام کے لیے رہا ہے’۔ ملا ہیبت اللہ نے کہا کہ ‘ہم اپنی مجاہد اور ناراض قوم کو یقین دلاتے ہیں کہ ان پر ظلم نہیں کیا جائے گا’۔ مختلف زبانوں میں جاری کیے جانے والے اس پیغام میں انہوں نے اس امر پر زور دیا کہ افغانستان میں اسلامی نظام کا فروغ، آزادی اور طاقت کا انحصار افغان اتحاد پر ہے’۔ ملا ہیبت اللہ نے اپنے پیغام میں امریکا کے ساتھ معاہدے پر دستخط اور بین الافغان مذاکرات کی کوششوں سے اتفاق کا اظہار کیا۔ انہوں نے کہا کہ ‘ہم امن کی جانب گامزن ہیں اور قیدیوں کی رہائی اس کا ایک اہم حصہ ہے جو دونوں فریقین میں اعتماد کو پیدا کرکے گا امن کی راہ میں حائل رکاوٹوں کو دور کرے گا۔
طالبان رہنما کے پیغام کے جواب میں تاحال افغان حکومت کی جانب سے کسی ردعمل کا اظہار نہیں کیا گیا۔
یاد رہے کہ امریکا اور طالبان کے درمیان رواں سال 29 فروری کو قطر کے دارالحکومت دوحہ میں امن معاہدہ ہوا تھا جس میں طے پایا تھا کہ افغان حکومت طالبان کے 5 ہزار قیدیوں کو رہا کرے گی جس کے بدلے میں طالبان حکومت کے ایک ہزار قیدی رہا کریں گے۔
قیدیوں کے تبادلے کا عمل 10 مارچ سے قبل مکمل ہونا تھا اور طالبان اور افغان حکومت کے درمیان مذاکرات کا آغاز ہونا تھا تاہم متعدد مسائل کی وجہ سے یہ عمل سست روی سے آگے بڑھا۔
