حکومت مہنگائی کو کنٹرول کرنے میں ناکام ہوگئی

پی ٹی آئی کے سینئر رہنما جہانگیر ترین نے مہنگائی کو کنٹرول کرنے میں حکومت کی ناکامی تسلیم کرتے ہوئے کہا ہے کہ عوام اس وقت سخت اذیت میں مبتلا ہے ، سرکار کو سب چھوڑ کر دام کنٹرول کرنا چاہئے۔

تفصیلات کے مطابق چیئرمین یونین کونسل شیخ محمد اسلم کی جانب سے مسلم لیگ ن کو چھوڑ کر پی ٹی آئی میں شامل ہونے کی تقریب سے خطاب کرتے ہوئے انھوں‌ نے کہا کہ شیخ محمد اسلم کو تحریک انصاف میں شمولیت پر خوش آمدید کہتاہوں۔ شیخ اسلم کی شمولیت سے پارٹی کہروڑپکا میں مضبوط ہوگی۔ کہروڑپکا کا خستہ حال ہوچکاہے، ملکر اسکو خوشحال بنائیں گے۔ لودھراں کی طرح کہروڑپکا کے لئے فنڈز کی پوری کوشش کرینگے۔

میڈیا سے گفتگو کرتے ہوئے پی ٹی آئی رہنما جہانگیر ترین نے کہا کہ پاکستان تحریک انصاف میری جماعت ہے ہم سب تحریک انصاف میں کھڑے ہیں۔ احمد محمود میرے قریبی عزیز ہیں، انکے ساتھ ملاقات یا سفر کوئی مسئلہ نہیں۔مہنگائی سپلائی اور ڈیمانڈ سے کنٹرول ہوتی ہے اگر حکومت کی جانب سے بروقت امپورٹ کے اہم فیصلے ہوجاتے تو چینی، گندم سمیت دیگر مسائل پیدا نہ ہوتے۔

پی ٹی آئی کے رہنما نے کہا کہ ہر الیکشن میں ٹکٹ کا فیصلہ پارٹی کرتی ہے، پارٹی فیصلے کے مطابق ٹکٹ دیے گئے۔ ہماری کوشش ہے پورے لودھراں میں ترقیاتی کام ہوں، فنڈز پنجاب حکومت نے دینے ہیں ترین ایجوکیشن فاؤنڈیشن لودھراں میں کام کررہا ہے۔ دنیا پور والوں نے درخواست کی ہم نے وہاں کام کیا۔

اس موقع پر شیخ اسلم کا کہنا تھا کہ شہید کانجو گروپ سے 40 سالہ سیاسی رفاقت ختم کرنے کا اعلان کرتا ہوں، جہانگیر خان ترین کی قیادت میں اپنا سیاسی سفر جاری رکھوں گا۔