طلاق کے بعد سائرہ یوسف اور شہروز کی پہلی رومانٹک فلم

ماضی کی مقبول رومانوی جوڑی سائرہ یوسف اور شہروز سبزواری طلاق کے دو برس بعد فروری 2023 میں عالمی یوم محبت کے موقع پر پہلی بار اسکرین پر رومانس کرتے دکھائی دیں گے۔ سائرہ یوسف اور شہروز سبزواری اگرچہ ماضی میں بھی ایک ساتھ سکرین پر کام کر چکے ہیں اور حقیقی زندگی میں بھی رومانس کر چکے ہیں لیکن اب وہ طلاق کے دو سال بعد رومانوی فلم ’بے بی لیشیس‘ (Babylicious) میں ایک ساتھ کام کرتے دکھائی دیں گے۔

سائرہ اور شہروز کی شادی کے آٹھ برس بعد 2020 میں طلاق ہوگئی تھی، دونوں نے 2012 میں پسند کی شادی کی تھی اور انکا شمار بہترین رومانوی جوڑیوں میں ہوتا تھا۔ طلاق کے چند ہفتوں بعد ہی شہروز سبزواری نے ماڈل صدف کنول سے شادی کرلی تھی اور انہیں رواں سال ایک بیٹی بھی ہوئی تھی۔ لیکن سائرہ نے تاحال دوسری شادی نہیں کی حالانکہ وہ مستقبل میں رشتہ ازدواج میں بندھنے کا اشارہ دے چکی ہیں۔ طلاق کے بعد اگرچہ سائرہ یوسف اور شہروز سبزواری الگ الگ ڈراموں اور فلموں میں کام کرتے دکھائی دیتے رہے ہیں لیکن اب دونوں ایکساتھ ایک رومانوی فلم میں دکھائی دیں گے۔

سائرہ یوسف اور شہروز نے اپنی آنے والی فلم ’بے بی لیشیس‘ کی پہلی جھلک انسٹا گرام پر شیئر کرتے ہوئے تصدیق کی کہ ان کی فلم فروری 2023 میں ریلیز کی جائے گی۔ سائرہ یوسف نے اپنی پوسٹ میں بتایا کہ انہیں اس فلم پر کام کرتے ہوئے ایک دہائی سے زیادہ کا عرصہ لگا اور اب وہ خوش ہیں کہ ان کی فلم جلد ریلیز ہوگی۔ اداکارہ نے لکھا کہ وہ بہت خوش ہیں اور انہیں امید ہے ک مداح ان کی آنے والی فلم کو ضرور دیکھیں گے۔ انہوں نے سابق شوہر شہروز سبزواری کو مینشن کرتے ہوئے ان کے لیے نیک خواہشات کا اظہار کیا۔ دوسری جانب شہروز نے بھی فلم کی پہلی جھلک کو شیئر کرتے ہوئے کہا کہ وہ ویلنٹائنز ڈے کا انتظار کر رہے ہیں تاکہ ان کی رومانوی فلم کو ریلیز کیا جا سکے۔ انہوں نے بھی سائرہ کو مینشن کرتے ہوئے ان کے لیے نیک خواہشات کا اظہار کیا۔

’بے بی لیشیس‘ کی پہلی جھلک میں سائرہ یوسف اور شہروز سبزواری کو رومانوی انداز میں ایک دوسرے کو گلے لگاتے ہوئے دکھایا گیا ہے۔ اس فلم کی ہدایات عمر عیسیٰ خان نے دی ہیں اور اس کی کہانی شادی شدہ جوڑے کے گرد گھومتی ہے۔ اس فلم کو سائرہ نے ہی پروڈیوس کیا ہے، جنہوں نے کوکونٹ نامی پروڈکشن کمپنی بنا رکھی ہے۔

سائرہ یوسف اور شہروز نے اس فلم کی شوٹنگ پر طلاق سے کئی سال قبل کام شروع کر دیا تھا مگر فلم مسلسل تاخیر کا شکار رہی۔ جب ان دونوں کی طلاق ہوئی تب تک اس فلم کی 95 فیصد شوٹنگ مکمل کرلی گئی تھی۔خیال کیا جا رہا ہے کہ فلم کا ٹریلر آئندہ ماہ جنوری تک ریلیز کیا جائے گا جب کہ ممکنہ طور پر سائرہ یوسف اور شہروز سبزواری فلم کی تشہیر کے لیے ایک ساتھ دکھائی دیں گے۔