خضدار: زائرین کی بس الٹنے سے 18 افراد جاں بحق، 48 زخمی
بلوچستان کے ضلع خضدار میں زائرین کی بس الٹنے سے 18 افراد جاں بحق جب کہ 48 زخمی ہوگئے جن میں سے بعض کی حالت تشویشناک ہے۔
بدقسمت بس بھلونک کے مقام پر موڑ کاٹتے ہوئے ڈرائیور سے بے قابو ہوکر الٹ گئی اور کھائی میں جا گری جس کے باعث زیادہ تر اموات بس کی چھت پر سوار افراد کی ہوئیں۔ بس میں سوار افراد سندھ کے ضلع دادو سے تعلق رکھتے تھے جو وڈھ کاکا ہیر میں عرس و دستار بندی کی تقریب میں شرکت کے بعد واپس اپنے علاقے کو جارہے تھے۔ واقعے کی اطلاع ملتے ہی مقامی لیویز اور ایدھی کے رضاکاروں نے نعشوں اور زخمیوں کو گورنمنٹ ٹیچنگ اسپتال خضدار پہنچایا۔ ڈپٹی کمشنر خضدار میجر (ر) بشیر احمد بڑیچ کے مطابق حادثہ جمعہ کی صبح پیش آیا جس کے نتیجے میں 15افراد موقع پر ہی جاں بحق ہوگئے تھے جب کہ 3شدید زخمی اسپتال میں طبی امداد کے دوران زخموں کی تاب نہ لاتے ہوئے چل بسے۔ جاں بحق افراد میں میں دو سگے بھائی اور ایک ہی خاندان کے 4 افراد بھی شامل ہیں جب کہ 48 زائرین زخمی ہیں۔ بعدازاں ضلعی انتظامیہ نے نعشوں کوضروری کارروائی کے بعد لیویز، ایدھی ایمبولینسز اور دیگر ذرائع سے ان کے آبائی علاقے دادو روانہ کردیں۔ واقعے کی اطلاع ملتے ہی ڈپٹی کمشنر خضدار میجر (ر) بشیر احمد بڑیچ اور ضلعی منتظم صحت تحصیلدار خضدار شہزاد زہری اسپتال پہنچے اور مریضوں کو طبی امداد کی فراہمی کی نگرانی کی۔ علاوہ ازیں مقامی سماجی رہنماؤں نے شدید زخمیوں کےلیے خون کے عطیات و ادویات کا اہتمام کرنے میں معاونت کی۔ حادثے میں شدید زخمی ہونے والے افراد کو گورنمنٹ ٹیچنگ اسپتال میں ابتدائی طبی امداد کے بعد سی ایم ایچ خضدار منتقل کردیا گیا۔ جاں بحق ہونے والوں میں محمد آصف، مہر دل، نظام الدین، اسد علی، حافظ محمد ہاشم علی، مراد عاطف علی، نثار احمد، جاوید علی، زین العابدین، عاشق علی، سجاد علی، سہیل احمد، منیر احمد، احسان علی، امان اللہ، عبدالحفیظ شامل ہیں جب کہ ایک جاں بحق شخص کی شناخت نہیں ہوسکی۔ قبل ازیں 31 مئی کو پنجاب کے ضلع خانیوال کی تحصیل کبیر والا میں لاہور سے ملتان جانے والی مسافر بس پل سے نیچے جا گری تھی جس کے نتیجے میں 9 مسافر جاں بحق جب کہ 28 زخمی ہوگئے تھے۔ علاوہ ازیں 29 مئی کو مظفر آباد کے جنوب میں مسافر بس سیکڑوں فٹ کھائی میں دریائے جہلم کے کنارے جا گرنے سے 10 افراد جاں بحق اور 15 زخمی ہوگئے تھے۔ 20 مئی کو روہڑی کے قریب دبر تھانے کی حدود میں مسافر کوچ الٹ گئی جس کے نتیجے میں 13 مسافر جاں بحق جب کہ متعدد زخمی ہوگئے تھے۔
