دوسرا ون ڈے،پاکستان نے نیدر لینڈز کو7 وکٹوں سے شکست دیدی
پاکستان نے دوسرے ون ڈے میچ میں میزبان ٹیم نیدر لینڈز کو 7 وکٹوں سے شکست دے کر سیریز اپنے نام کر لی۔
روٹر ڈیم میں پاکستان اور نیدر یلنڈز کی ٹیمیں تین ایک روزہ میچ کی سیریز کے دوسرے میچ میں ایک دوسرے کے مدمقابل تھیں۔
نیدرلینڈز نے پہلے بیٹنگ کرتے ہوئے قومی ٹیم کو جیت کے لیے 187 رنز کا ہدف دیا،پاکستان کی جانب سے ہدف کے تعاقب کے لیے فخر زمان اور امام الحق اوپننگ کے لیے آئے تو قومی ٹیم کو آغاز اچھا نہ مل سکا اور صرف 10 کے اسکور پر پہلی وکٹ گر گئی، مجموعی اسکور 11 پر پہنچا تو امام الحق بھی پویلین کی جانب چلتے بنے۔
جس کے بعد کپتان اور محمد رضوان نے شراکت داری کر کے مجموعی اسکور کو 99 تک پہنچایا تو بابر اعظم 57 رنز بنا کر آؤٹ ہوئے، یہ پاکستان کی آخری وکٹ تھی،دوسری اینڈ پر محمد رضوان نے آغا سلمان کے ساتھ مل کر ایک اور شراکت داری قائم کی اور پاکستان کی فتح کو یقینی بنایا۔ قومی ٹیم نے 187 رنز کا ہدف 33.4 اوورز میں تین وکٹوں کے نقصان پر حاصل کیا،محمد رضوان 69 اور آغاز سلمان 50 رنز کے ساتھ ناٹ آؤٹ رہے۔ نیدرلینڈز کے وی ویان کنگ ما نے دو جبکہ آریان دت نے ایک وکٹ حاصل کی۔
قبل ازیں نیدر لینڈزنے پہلے بیٹنگ کا آغاز کیا توابتداء میں مشکات کا شکار رہی، انکے 3 کھلاڑی محض 8 رنز پر پویلین لوٹ گئے تاہم ٹام کوپر اور ڈی لیڈ نے 100 رنز سے زائد کی پارٹنرشپ کرکے ٹیم کا اسکور 117 تک پہنچایا۔ دونوں بالترتیب 66 اور 50 رنز بناکر نمایاں رہے۔
میزبان ٹیم کے دیگر کھلاڑیوں میں وکرم جیت سنگھ 1، میکس او ڈاؤڈ 1، ویزلی بیریسی 3، اسکاٹ ایڈورڈ 5 اور تیجا ندامانورو بغیر کوئی رن بنائے وکٹ گنوابیٹھے۔
قومی ٹیم کی جانب سے حارث رؤف، نسیم شاہ اور محمد نواز نے دو دو وکٹیں حاصل کیں۔
قبل ازیں نیدر لینڈز کے کپتان نے ٹاس جیت کر پہلے بیٹنگ کرنے کا فیصلہ کیا، انہوں نے کہا کہ کوشش ہوگی میچ میں کامیابی سمیٹ کر سیریز برابر کرنے کی کوشش کرٰیں گے۔ اس موقع پر قومی کرکٹ ٹیم کے کپتان بابراعظم نے کہا کہ ٹیم میں کوئی تبدیلی نہیں کی گئی ہے، میچ جیت کر سیریز میں فیصلہ کن برتری حاصل کرنا چاہتے ہیں۔
واضح رہے کہ اس سے قبل پاکستان نے تین ون ڈے میچوں پر مشتمل سیریز کے پہلے میچ میں پاکستان نے نیدر لینڈرز کو 16 رنز سے شکست دی تھی۔
