شاہد آفریدی کی آزاد کشمیر میں نریندر مودی پر تنقید، انڈیا میں غم و غصہ
دنیا بھر میں کرکٹ جیسے کھیل کو سیاست سے پاک رکھنے کی وکالت بے شمار لوگ کرتے ہیں مگر پاکستان اور انڈیا جیسے ملکوں میں کرکٹ ہی کیا چند کرکٹرز نے تو سیاست کو ہی اپنا پیشہ بنا لیا۔
پاکستان کرکٹ ٹیم کے سابق آل راؤنڈر شاہد آفریدی اگر میدان میں اپنی جارحانہ بیٹنگ کی بدولت مشہور تھے تو میدان کے باہر آج بھی وہ متنازع سیاسی بیانات کے باعث میڈیا میں شہ شرخیوں کی زینت بنتے رہتے ہیں۔
شاہد آفریدی کی چند روز قبل آزاد کشمیر کے دورے کے دوران بنائی گئی ایک ویڈیو انڈیا میں وائرل ہوگئی ہے جہاں انہیں انڈیا کے وزیر اعظم نریندر مودی پر تنقید کرتے دیکھا جاسکتا ہے۔
Shame on @harbhajan_singh and Yuvraj singh https://t.co/QFLI51Iybj
— Jai Hind🇮🇳🇮🇳🇮🇳 (@gayatrimata123) May 17, 2020
پاکستان کے سابق کپتان کورونا وائرس کی وباء کے پیش نظر اپنے خیراتی ادارے ’شاہد آفریدی فاؤنڈیشن‘ کے ذریعے ملک بھر میں ضرورت مند افراد کےلیے راشن تقسیم کر رہے ہیں۔
سماجی رابطے کی ویب سائٹ ٹوئٹر پر شاہد آفریدی کا پاکستان میں ٹرینڈ کرنا کوئی اچھنبے کی بات نہیں مگر گزشتہ چند روز میں انڈیا اور بنگلہ دیش کے سوشل میڈیا پیجز پر بھی پاکستانی لیگ اسپنر کی بازگشت سنی جاسکتی ہے۔
چند روز قبل بنگلہ دیش کے مایاناز بلے باز اور وکٹ کیپر مشفیق الرحیم نے کووڈ 19 ریلیف فنڈ کی کوششوں کے سلسلے میں اُس بلے کو نیلامی کےلیے پیش کیا تھا جس سے انہوں نے 2013 میں سری لنکا کے خلاف بنگلہ دیش کےلیے پہلی ڈبل سنچری بنائی تھی۔
پاکستان کے سابق کپتان شاہد آفریدی نے مشفیق الرحیم کے اس بلے کو 20 ہزار ڈالر میں حاصل کر لیا جس کے بعد سے بنگلہ دیش میں کرکٹ کے مداحوں نے انھیں انسانیت کی اس خدمت پر خوب سراہا۔
انڈیا میں ٹوئٹر پر ٹرینڈ کرنے کی وجہ شاہد آفریدی کا خیراتی کام نہیں بلکہ کشمیر سے متعلق ایک حالیہ بیان ہے جس پر انڈیا کی عوام میں شدید غم و غصہ پایا جاتا ہے۔
ٹوئٹر پر وائرل ہونے والے ویڈیو میں شاہد آفریدی کو انڈیا کے وزیراعظم نریندر مودی کو تنقید کا نشانہ بناتے ہوئے کہا کہ وہ ’کورونا وائرس سے بھی بڑی بیماری ہیں۔‘
گزشتہ برسوں کی طرح شاہد آفریدی نے ایک مرتبہ پھر مقبوضہ کشمیر میں ہونے والے ’مظالم‘ کا بھی ذکر کیا اور کہا کہ ’چھوٹے سے کشمیر میں سات لاکھ سے زائد فوج جمع کردی ہے۔‘
فوجی اہلکاروں کی موجودگی میں اپنے خطاب میں شاہد آفریدی کا یہ بھی کہنا تھا کہ ’ہم نے تو اُن کے چوزوں کو ہوا میں مارا، چائے پلا کر واپس بھجوایا ہے عزت کے ساتھ۔‘
اس کے علاوہ سابق کپتان نے پاکستان کرکٹ بورڈ سے پاکستان سپر لیگ کے اگلے سیزن میں آزاد کشمیر کے نام سے ٹیم شامل کرنے کا مطالبہ بھی کیا۔
ماضی میں بھی شاہد آفریدی کے ان لفظی حملوں کا جواب انڈیا کے سابق اوپننگ بلے باز گوتم گمبھیر ہی دیتے آئے ہیں اور روایت کو برقرار رکھتے ہوئے انہوں نے اس ویڈیو کے جواب میں ایک ٹویٹ شیئر کی۔
شاہد آفریدی کی صحیح عمر کے حوالے سے ایک تنازعہ ضرور رہا ہے اور اسی کو نشانہ بناتے ہوئے گوتم گمبھیر نے انہیں ایک ’16 سالہ شخص‘ قرار دے ڈالا۔
انہوں نے کہا کہ ’شاہد آفریدی، قمر جاوید باجوہ اور عمران خان جتنا چاہے زہر اگل لیں مگر روز آخرت تک کشمیر نہیں ملے گا۔‘
انہوں نے آفریدی کو مخاطب کرتے ہوئے یہ بھی کہا کہ ’بنگلہ دیش یاد ہے؟‘
شاہد آفریدی کے ’چوزوں‘ والے بیان کو سوشل میڈیا پر صارفین نے انڈین پائلٹ ونگ کمانڈر ابھینندن ورتھمان سے جوڑنے میں زیادہ دیر نہیں لگائی۔ انڈین صارفین ابھینندن کو نہ صرف اپنے ’ہیرو‘ کے طور پر پیش کرتے نظر آئے بلکہ پاکستانیوں پر تاریخ توڑ مروڑ کر پیش کرنے کا بھی الزام لگایا۔
یاد رہے کہ27 فروری سنہ 2019 کو بالاکوٹ کے گاؤں جابہ پر انڈین طیاروں کی بمباری کے ایک دن بعد لائن آف کنٹرول کے قریبی علاقے ہوڑاں میں پاکستان کی فضائیہ نے انڈین جیٹ گرا کر فائٹر پائلٹ وِنگ کمانڈر ابھینندن ورتمان کو گرفتار کیا تھا۔
کورونا کی وباء کے خلاف جنگ میں شاہد آفریدی کی فلاحی فاؤنڈیشن کو کچھ عرصہ قبل انڈیا کے سابق کرکٹر ہربھجن سنگھ اور یوراج سنگھ کی طرف سے تعاون کی یقین دہانی کرائی گئی تھی۔
انڈیا میں صارفین کو ہربھجن اور یووراج کے تعاون کی یہ پیشکش راس نہیں آئی اور انہوں نے سوشل میڈیا کے ذریعے ہربھجن اور یوراج پر اپنا غصہ اتارنا شروع کردیا۔
شاہد آفریدی نے ہربھجن اور یوراج کی طرف سے مدد کے اعلان پر ان کا شکریہ ادا کیا تھا اور دونوں کھلاڑیوں کو تنقید کا نشانہ بنانے والوں کے رویے پر افسوس کا اظہار بھی کیا تھا۔
انڈیا کے مایاناز سابق بلے باز یوراج سنگھ نے اب سے کچھ دیر قبل ایک ٹویٹ میں کہا کہ وہ شاہد آفریدی کے بیان سے بہت مایوس ہوئے ہیں ان کا یہ بھی کہنا تھا کہ انہوں نے شاہد آفریدی کی مدد انسانیت کی بنیاد پر کی تھی مگر وہ آئندہ کبھی یہ نہیں کریں گے۔
اس مرتبہ ویڈیو وائرل ہونے کے بعد صارفین ایک بار پھر لوگوں کو یہ یاد دلاتے نظر آئے کہ یہ وہی کھلاڑی ہیں جن کی مدد انڈیا کے دو سابق کرکٹرز نے کی۔
پاکستان کے سابق کپتان شاہد آفریدی اور انڈیا کے سابق اوپنر گوتم گمبھیر سیاسی اور سماجی مسائل پر کھل کر تبصرہ کرتے دکھائی دیتے ہیں جس کے باعث یہ آپسی نوک جھونک صرف کرکٹ تک ہی محدود نہیں رہتی۔
گوتم گمبھیر نے گزشتہ سال مارچ میں قوم پرست حکمران جماعت، بھارتیہ جنتا پارٹی میں شمولیت اختیار کی تھی۔
انڈیا کی لوک سبھا یعنی پارلیمان کے گزشتہ سال ہونے والے انتخابات میں وہ مشرقی دلی کی نشست پر فتح یاب بھی ہوئے تھے۔
یاد رہے کہ رسمی طور پر سیاست میں آنے سے قبل 2018 میں بھی ان دونوں کرکٹرز میں کشمیر کے معاملے پر تلخ کلامی ہوئی۔
شاہد آفریدی نے اپریل 2018 میں ایک ٹویٹ کی جس میں انہوں نے مقبوضہ کشمیر کی صورت حال کو ’ہولناک اور پریشان کن‘ قرار دیا تھا۔
اس کے جواب میں گوتم نے لکھا تھا کہ آفریدی الفاظ کے چناؤ میں ذہنی طور پر پسماندہ ہیں۔
