صبور علی اپنی ڈانس ویڈیو بنانے پر ناراض کیوں ہوئیں؟

شادی کی تقریبات کے دوران ناچتے مہمانوں کے ٹھمکوں کی ویڈیوز کو اکثر سوشل میڈیا پر شیئر کرتے دیا جاتا ہے، لیکن اداکارہ صبور علی اور ان کے منگیتر علی انصاری ایک شادی پر اپنے رقص کی ویڈیو بنائے جانے اور اسے سوشل میڈیا پر شیئر کیے جانے پر سخت غصے میں آگئے۔ اداکارہ سجل علی کی بہن اداکارہ صبورعلی اور علی انصاری حال ہی میں اداکارہ مریم انصاری کی شادی کی تقریبات میں دیکھے گئے تھے، مریم انصاری اداکار علی انصاری کی بہن جبکہ صبور علی کی قریبی سہیلی بھی ہیں، جس کی وجہ سے وہ ان کی شادی کی تقریبات میں دل کھول کر گانوں پر رقص کرتے دکھائی دیئے۔
تاہم شادی کی تقریبات میں رضامندی اور اجازت کے بغیر منگیتر کے ساتھ ویڈیوز شوٹ کرنے والے افراد کے عمل کو اداکارہ صبور علی نے سخت نامناسب قرار دیا ہے، صبور علی نے انسٹا گرام پر شوبز پیج کی ایک پوسٹ شیئر کرتے ہوئے لکھا کہ یہ انتہائی حساس معاملہ ہے کہ کوئی کیوں کسی دوسرے کی ویڈیوز ان کی اجازت کے بغیر بنائے اور پھر انکی رضامندی کے بغیر اسے سوشل میڈیا پر وائرل بھی کردے؟
اداکارہ نے بغیر اجازت کے شوٹ کی گئی اپنی ایک وائرل ویڈیو کا سکرین شاٹ شیئر کرتے ہوئے لکھا کہ وہ اور علی انصاری اس عمل سے پریشان ہو گئے ہیں، یہ انتہا کی بدتمیزی ہے۔ صبور علی نے لکھا کہ اجازت اور رضامندی کے بغیر انکی اور علی انصاری کی ویڈیوز شوٹ کرنے سے جہاں وہ پریشان ہوئے، وہیں اسے سوشل میڈیا پر شیئر کیے جانے سے وہ اور بھی نال ہیں۔ انھوں نے لکھا کہ ایسا کرنا کسی کی پرائیویسی میں مخل ہونے کے مترادف ہے۔
تاہم ساتھ ہی صبور علی نے لکھا کہ مگر اس کے باوجود علی انصاری سمیت دیگر افراد نے شای کی خوشیوں اور تقریبات میں خوب مزے کیے اور اپنی خوشیوں کا جشن منایا، اداکارہ نے آخر میں مریم انصاری کی شادی کی ویڈیوز اور تصاویر کو پسند کرنے اور ان کا ساتھ دینے پر مداحوں کا شکریہ بھی ادا کیا۔

واضح رہے کہ مریم انصاری کی شادی کی تقریبات 20 دسمبر سے کراچی میں شروع ہوئی تھیں اور وہ 24 دسمبر کو پیا گھر سدھار گئی تھیں، مریم انصاری کی شادی کی تقریبات تین دن تک جاری رہیں، اداکارہ نے سابق کرکٹر معین خان کے بیٹے اویس خان سے شادی کی، جن سے فروری 2021 میں نکاح کیا تھا۔