حکومت نے آرمی چیف کی توسیع سے متعلق عمران کی تجویز ٹھکرا دی
حکومت نے تحریک انصاف کے چیئرمین عمران خان کی آرمی چیف کی مدت ملازمت میں توسیع سے متعلق تجویز ٹھکرا دی۔
خیال رہے کہ سابق وزیراعظم عمران خان نےگزشتہ روز ایک انٹرویو میں آرمی چیف جنرل قمر جاوید باجوہ کی مدت ملازمت میں توسیع کی تجویز پیش کی تھی اور کہا تھا کہ چاہتا ہوں نئی حکومت ہی نئے آرمی چیف کو تعینات کرے۔
اور اب حکومت نے عمران خان کی اس تجویز کو مسترد کردیا ہے۔ وزیر دفاع خواجہ آصف نے ٹویٹر پر کہا ہے کہ عمران خان اقتدار کی ہوس میں اتنا گر چکا ہے کہ آرمی چیف کے تقرر کو الیکشن اور سیاست سے نتھی کررہا ہے۔
خواجہ آصف نے کہا موجودہ حکومت اس ذمے داری سے متعلق مقررہ وقت پر آئین اور ادارے کی بہترین روایات کو مدنظر رکھتے ہوئے فیصلہ کرے گی، اہم قومی فیصلے سیاسی مفادات سے مشروط نہیں ہوتے۔
گزشتہ روز نجی ٹی وی سے گفتگو کے دوران بھی اس تجویز پر ردعمل دیتے ہوئے خواجہ آصف نے کہا تھاکہ عمران خان آرمی چیف کی تعیناتی کا عمل سوچے سمجھے منصوبے کے تحت متنازع بنا رہے ہیں کیوں کہ اس وقت اس موضوع پر بحث کرنا قبل از وقت ہے، آرمی چیف کی مدت میں ابھی ڈھائی ماہ کا وقت باقی ہے۔
انہوں نے کہا تھا اس موضوع پر بات کرنا اس وقت ملک کے مفاد میں نہیں اور نہ ہی دفاع کے ضامن ادارے کے سربراہ کو سیاست میں گھسیٹنا ادارے کے مفاد میں ہے۔
خواجہ آصف کا کہنا تھا ایک جانب چیئرمین پی ٹی آئی اسٹیبلشمنٹ کو نشانہ بنا رہے ہیں تو دوسری جانب اس سے بات چیت کے دروازے بھی کھولنے کے خواہش مند ہیں، عمران خان ہر صورت میں طاقت کا حصول چاہتے ہیں، اس سے ان کی ذہنی اور سیاسی پسماندگی ظاہر ہوتی ہے۔
