وینا کو راہ راست پر لانے کے چکر میں خود برباد ہو گیا ہوں

اداکارہ وینا ملک کے سابق شوہر اسد خٹک نے دعویٰ کیا ہے کہ انہوں نے اداکارہ کو ’راہ راست‘ پر لانے کےلیے ان سے شادی کی مگر ان کی کوششیں رائیگاں گئیں اور وینا نے نہ صرف خود کو تباہ کیا بلکہ ان کو بھی برباد کر دیا.
اپنے بولڈ اور عریاں حرکات کے لیے بدنام اداکارہ زاہدہ ملک المعروف وینا ملک نے اسد خٹک کے بعد سے شادی کے بعد نیک اور پارسا بننے کی کوشش کی اور دو سال شوبز کی دنیا سے بھی دور رہیں۔ لیکن پھر ان کے اندر کی بولڈ عورت جاگ اٹھی اور وینا نے دوبارہ سے شوبز کی دنیا کا رخ کر لیا جو میاں بیوی میں پہلے اختلافات، پھر علیحدگی اور بالآخر طلاق کا باعث بنا۔ اب وینا کے سابق شوہر اسد خٹک نے ٹوئٹر پر جاری کردہ اپنی دو مختصر ویڈیوز میں پہلی بار انکشاف کیا کہ انہوں نے کیوں وینا سے شادی کی اور بعد میں کن حالات سے گزرے۔ اسد خٹک نے دعویٰ کیا کہ ان کی وینا سے 2013 میں دبئی میں موجود پاکستانی قونصل خانے میں ملاقات ہوئی تھی، جہاں انہوں نے وینا کو پاکستان کی بدنام کا باعث بننے پر خوب سنائیں۔ اسد خٹک نے دعویٰ کیا کہ اسی ملاقات کے دوران وینا ملک نے بتایا کہ انہوں نے جو کچھ بھی کیا وہ مجبوری میں کیا اور اب وہ چاہتی ہیں کہ کوئی شریف انسان انہیں اپنالے۔ اسد خٹک کے مطابق مذکورہ ملاقات کے بعد انہوں نے راہ سے بھٹکی وینا ملک کے بطور مسلمان، بطور پاکستانی اور بطور اچھے خاندان کے فرد کی حیثیت سے ان سے شادی کر لی جس سے قبل اہل خانہ اور علما سے بھی مشاورت کی۔ اسد خٹک نے بتایا کہ وینا سے ملاقات کے صرف 8 دن بعد ہی ان دونوں نے شادی کرلی جو بعد میں انہیں بری طرح بھگتنا پڑی۔
اسد ملک نے بتایا کہ انہوں نے وینا ملک سے صرف اس لیے شادی کی کہ وہ انہیں راہ راست پر لانا چاہتے تھے۔ اسد خٹک نے دعویٰ کیا کہ وینا ملک نے انہیں بتایا تھا کہ وہ اسلام کی طرف لوٹنے کی خاطر بھی اداکاری چھوڑنا چاہتی ہیں۔ اسد خٹک نے یہ دعویٰ بھی کیا کہ انہوں نے اور دیگر علماء نے وینا ملک کو راہ راست پر لانے کی خوب کوشش کی مگر ایسا نہ ہوسکا، کیوں کہ اداکارہ نے ان سے جھوٹ اور صرف جھوٹ ہی بولا۔ انہوں نے وینا ملک پر دیگر سنگین الزامات عائد کرتے ہوئے ایک بار پھر دعویٰ کیا کہ وہ پاکستانی قونصل خانے کی مدد سے ان کے بچوں کو دبئی سے پاکستان اغوا کرکے لے گئیں۔ انہوں نے لوگوں سے اپیل کی کہ وہ ان کا ساتھ دیں کیوں کہ وینا ملک کے غلط اقدامات کی وجہ سے پاکستان کا نام بدنام ہو رہا ہے۔ انہوں نے سابق اہلیہ کو ملک کی بدنامی کا باعث قرار دیتے ہوئے لوگوں سے اپیل کی کہ وہ ان کےلیے انصاف کی مہم بھی چلائیں۔
یاد رہے کہ اسد خٹک اور وینا ملک نے 25 دسمبر 2013 کو شادی کی تھی اور دونوں کے دو بچے بھی ہیں، تاہم تعلقات خراب ہونے پر دونوں میں محض 4 سال بعد 2017 کو طلاق ہوگئی تھی۔اب دونوں کے درمیان بچوں کی حوالگی سے متعلق سوشل میڈیا پر جنگ جاری ہے اور دونوں ایک دوسرے پر سنگین الزامات لگاتے آ رہے ہیں۔ دونوں کا دعویٰ ہے کہ دونوں نے ایک دوسرے کو قانونی نوٹس بھی بھجوا رکھے ہیں، تاہم تاحال دونوں نے ایک دوسرے کے قانونی نوٹسز ملنے کی تصدیق نہیں کی۔ اسد خٹک اس وقت امریکا میں مقیم ہیں اور ان کے پاس دبئی کی شہریت بھی ہے، ان کا دعویٰ ہے کہ وینا ملک متحدہ عرب امارات کی ریاست دبئی میں موجود پاکستانی قونصل خانے کی مدد سے ان کے امریکی اور یو اے ای شہریت رکھنے والے دونوں بچوں کو اغوا کرکے پاکستان لے گئی ہیں۔ جب کہ وینا ملک کا دعویٰ ہے کہ دبئی و پاکستان کی عدالتوں نے بچوں کی پرورش ان کے ذمے کر رکھی ہے، جس کی وجہ سے وہ عدالتی احکامات کی روشنی میں بچوں کو اپنے ساتھ لے آئی ہیں۔ اسی معاملے پر دونوں میں گزشتہ چند ہفتوں سے سوشل میڈیا پر جنگ جاری ہے اور دونوں ایک دوسرے خلاف کئی دعوے اور انکشافات کرتے دکھائی دیتے ہیں۔ گزشتہ ماہ اسد خٹک مبینہ طور پر وینا ملک کی ایک آڈیو کلپ بھی سامنے لے آئے تھے، جس میں وہ انہیں مغلظات سنانے سمیت ان کی والدہ اور بہنوں کو اٹھوانے کی دھمکیاں دیتی دکھائی دیں۔ اسد خٹک کا یہ بھی کہنا ہے کہ وینا ملک ان کو ڈرانے دھمکانے کے لیے پاکستانی خفیہ ایجنسی میں اپنے تعلقات بھی استعمال کر رہی ہیں جو ان کے لیے پریشانی کا باعث ہیں۔