پاکستان دنیا کے پہلے تین کرپٹو اپنانے والے ممالک میں شامل

وزیراعظم کے معاون خصوصی برائے بلاک چین اور کرپٹو، بلال بن ثاقب نے کہا ہے کہ پاکستان میں تقریباً 3 سے 4 کروڑ افراد ڈیجیٹل اثاثے استعمال کر رہے ہیں. پاکستان دنیا کے پہلے تین ممالک میں شامل ہے جو کرپٹو کو اپنانے میں آگے ہیں۔

اسلام آباد میں پریس کانفرنس کے دوران بلال بن ثاقب نے بتایا کہ تاریخ میں پہلی بار عالمی ایکسچینجز کے لیے ایک منظم، شفاف اور عالمی معیار کا راستہ کھولا گیا ہے۔ ان کے بقول، یہ اقدام نئی سوچ اور ادارہ جاتی تبدیلی کی عکاسی کرتا ہے۔

انہوں نے مزید کہا کہ بائنانس اور ایچ ٹی ایکس کو این او سی جاری کرنا اس نئی سوچ کا عملی مظاہرہ ہے۔ دنیا کے بڑے مالی مراکز بھی مرحلہ وار ماڈلز اپنانے میں دلچسپی رکھتے ہیں۔ پاکستان نے عالمی مالیاتی نظام کے تقاضوں کے مطابق بروقت اور درست فیصلے کیے ہیں۔

معاون خصوصی نے کہا کہ قانونی اور منظم طریقے کے بغیر صلاحیتوں کا فائدہ نہیں اٹھایا جا سکتا۔ انہوں نے زور دیا کہ 3 سے 4 کروڑ پاکستانی پہلے ہی ڈیجیٹل اثاثے استعمال کر رہے ہیں اور عالمی بانڈ مارکیٹ جو 100 ٹریلین ڈالر تک پہنچ چکی ہے، رفتہ رفتہ ڈیجیٹل اثاثوں کی طرف بڑھ رہی ہے۔ فریم ورک نہ صرف تجارتی مقاصد بلکہ مختلف صنعتوں کے لیے بھی فائدہ مند ثابت ہوگا۔

 انہوں نے یہ بھی کہا کہ ملک میں ڈیجیٹل اثاثے اپنانے کی غیر معمولی صلاحیت موجود ہے اور اگلے 10 سال میں پاکستان ٹیکنالوجی کے ذریعے اپنی خودمختاری مزید مضبوط کر لے گا۔