پاکستان ریلوے نے کوچز کو آئسولیشن وارڈ میں تبدیل کردیا
کورونا وائرس کے مد نظر پاکستان ریلوے نے تمام بزنس کلاس اور ایئرکنڈیشنڈ سلیپر کوچز کو موبائل آئسولیشن وارڈز میں تبدیل کردیا جس میں 2 ہزار کورونا وائرس کے مریضوں کا علاج ممکن ہوسکے گا۔
وفاقی وزیر ریلوے شیخ رشید نے راولپنڈی اسٹیشن پر صحافیوں کو بتایا کہ متعلقہ حکام کی درخواست پر مذکورہ موبائل آئسولیشن وارڈز کو ملک کے کسی بھی حصے میں بھیج دیا جائے گا۔
انہوں نے اس ضمن میں بتایا گیا کہ مجموعی طور پر220 کوچز کو موبائل آئسولیشن وارڈ میں تبدیل کیا گیا ہے جب کہ ہر کوچ کے 9 کمپارٹمنٹ ہوتے ہیں اس کا مطلب ہے کہ ایک ہی کمپارٹمنٹ میں 9 وارڈز دستیاب ہیں۔
ہنگامہی بنیادوں پر ٹرینوں کےکوچز کو 300 کمروں کو آئسولیشن وارڈز ہسپتال میں منتقل کردیا۔
#Covid_19#coronavirusinpakistan#CoronaVirusUpdates #Coronavirustruth pic.twitter.com/EXNm53nijb— Sheikh Rashid Ahmed (@ShkhRasheed) March 30, 2020
علاوہ ازیں ان کا کہنا تھا کہ پاکستان ریلویز ساتوں ڈویژنوں راولپنڈی، پشاور، لاہور، کراچی کوئٹہ، سکھر اور ملتان میں 100/100 بستر دستیاب ہیں، ہر ایک میں ایک وینٹیلیٹر موجود ہے۔
شیخ رشید کا کہنا تھا کہ پاکستان میں صورت حال اتنی خراب نہیں ہے جتنی اٹلی، اسپین یا امریکا میں ہے۔
واضح رہے کہ وزارت ریلوے نے وزیراعظم عمران خان کی ہدایت پر مسافر ٹرینیں تاحکم ثانی معطل کردی ہیں جب کہ فریٹ ٹرینیں پورے ملک میں چل رہی ہیں۔
اس ضمن میں شیخ رشید احمد نے کہا تھا کہ ‘ہم کل سے مسافر ٹرینیں نہیں کھول رہے، یہ ہدایت گزشتہ روز کور کمیٹی کے اجلاس میں وزیر اعظم عمران خان نے دی ہے، پہلے ہمارا خیال تھا کہ ہم یکم اپریل سے مسافر ٹرینیں چلانا شروع کردیں گے لیکن وزیر اعظم نے ہدایت کی ہے کہ یہ ٹرینیں تاحکم ثانی معطل رہیں گی۔’
واضح رہے کہ اس سے قبل بھارت میں کورونا وائرس کے ممکنہ بڑھتے ہوئے کیسز کے پیش نظر حکام نے ریلوے کوچز کو آئسولیشن وارڈ بنانے کی تیاری شروع کردی تھی۔
