کراچی: جماعت اسلامی کی ریلی میں کریکر دھماکہ، متعدد زخمی
کراچی میں یونیورسٹی روڈ پر بیت المکرم مسجد کے قریب جماعت اسلامی کی کشمیر ریلی میں دستی بم حملے میں کم از کم 25 افراد زخمی ہوگئے،جن میں خواتین اور بچے بھی شامل ہیں۔
پولیس کے مطابق دھماکا ریلی کے قریب چلتی گاڑی سے نامعلوم ملزمان کی جانب سے کریکر پھینکنے کے نتیجے میں ہوا جو فرار ہونے میں کامیاب ہوگئے۔عینی شاہدین کے مطابق دھماکے کے نتیجے میں بھگدڑ مچ گئی اور متعدد افراد کو زخمی ہوکر گرتے ہوئے دیکھا گیا۔ سینئر سپرنٹندنٹ پولیس (ایس ایس پی) شرقی ساجد سدوزئی نے کہا کہ ریلی میں 2 نامعلوم موٹر سائیکل سوار ملزمان نے آر جی ڈی ون گرینیڈ پھینکا اور فرار ہوگئے۔انہوں نے کہا کہ کریکر دھماکے میں 20 سے زائد افراد زخمی ہوئے ہیں جبکہ یہ پلانٹڈ بم دھماکا نہیں تھا۔
ترجمان جماعت اسلامی نے کہا کہ ریلی کے مخالف سمت کے روڈ پر مرکزی ٹرک کے قریب موٹر سائیکل میں کوئی ہلکا دھماکا ہوا جس کے نتیجے میں 3 سے 4 افراد زخمی ہوئے۔انہوں نے کہا کہ زخمیوں کو ہسپتال منتقل کیا جارہا ہے جن میں سے 2 کی حالت تشویشناک ہے۔
دوسری جانب ریسکیو حکام نے کہا کہ کراچی کے علاقے گلشن اقبال میں بیت المکرم مسجد کے قریب دھماکے میں 24 افراد زخمی ہوئے۔ان کا کہنا تھا کہ موٹر سائیکل سوار ملزمان دستی بم پھینک کر فرار ہوگئے جبکہ دھماکے سے قریبی گاڑیوں کے شیشے بھی ٹوٹ گئے۔
کراچی میں جماعت اسلامی کی یکجہتی کشمیر ریلی پر بم حملہ بزدلانہ کارروائی ہے۔ شہر میں اب بھی بھارتی ایجنٹ موجود ہیں جن سے اہل کشمیر سے اظہاریکجہتی برداشت نہیں ہوا۔ اس طرح کے اوچھے ہتھکنڈوں سے خوفزدہ نہیں ہوں گے۔ اہل کشمیر کی زیادہ جرات کے ساتھ ترجمانی کریں گے۔
#JI_StandsForKashmir— Siraj ul Haq (@SirajOfficial) August 5, 2020
امیر جماعت اسلامی سراج الحق نے سماجی رابطے کی ویب سائٹ پر ٹوئٹ میں کراچی میں جماعت اسلامی کی یکجہتی کشمیر ریلی پر بم حملے کو بزدلانہ کارروائی قرار دیتے ہوئے کہا کہ شہر میں اب بھی بھارتی ایجنٹ موجود ہیں جن سے اہل کشمیر سے اظہار یکجہتی برداشت نہیں ہوا۔انہوں نے کہا کہ اس طرح کے اوچھے ہتھکنڈوں سے خوفزدہ نہیں ہوں گے اور اہل کشمیر کی زیادہ جرات کے ساتھ ترجمانی کریں گے۔
پرامن ریلی پر بزدلانہ حملے میں ہمارے درجنوں لوگ شدید زخمی ہوئے ہیں۔ یہ بھارت اور را کا کارنامہ ہے۔
بزدلانہ کارروائیوں سے ہمارا راستہ نہیں روکا جا سکتا۔ جماعت اسلامی اس جدوجہد کو مزید تیز کرے گی۔ امیر جماعت اسلامی کراچی حافظ نعیم الرحمن کا اعلان#JI_StandsForKashmir pic.twitter.com/686j38pMNv— Jamaat e Islami Pakistan (@JIPOfficial) August 5, 2020
عینی شاہدین کے مطابق جماعت اسلامی کی یوم استحصال کشمیر ریلی میں دستی بم پھینکا گیا، ریلی بیت المکرم مسجد سے حسن اسکوائر کی جانب جارہی تھی جبکہ دھماکا حافظ نعیم الرحمٰن کی تقریر کے دوران ہوا۔امیر جماعت اسلامی کراچی حافظ نعیم الرحمٰن نے دھماکے کی شدید مذمت کی۔تقریر کے دوران انہوں نے کہا کہ بزدلانہ کارروائیوں سے جذبوں کو مہمیز نہیں کیا جاسکتا اور بھارتی خفیہ ایجنسی ‘را’ کے ایجنٹوں نے ریلی میں حملہ کرکے بزدلانہ کارروائی کی۔
