کیوں نہ جانوروں کی موت کے ذمہ داروں کو انہی پنجروں میں بند کردیا جائے

اسلام آباد ہائی کورٹ کے چیف جسٹس اطہر من اللہ نے وفاقی دارالحکومت کے مرغزار چڑیا گھر میں جانوروں کی ہلاکت سے متعلق از خود نوٹس کی سماعت کے دوران ریمارکس دیے ہیں کہ جس طرح چڑیا گھر میں غفلت ہوئی ہے اس سے لگتا ہے کہ پوری ریاست ایسے ہی چل رہی ہے۔ انہوں نے کہا کہ یہاں پر تو لوگ بے زبان جانوروں کا کھانا تک کھا گئے ہیں تو انسانوں کے ساتھ کیا سلوک ہوتا ہو گا۔ چیف جسٹس اطہر من اللہ نے ریمارکس دیے کہ کیوں نہ جانوروں کی موت کے ذمہ داران کو ان ہی پنجروں میں بند کر دیں جہاں پر یہ جانور رہا کرتے تھے۔
واضح رہے کہ گذشتہ ماہ اسلام آباد ہائی کورٹ کے حکم پر اسلام آباد کے مرغزار چڑیا گھر میں موجود دو شیروں کی لاہور منتقلی کا حکم دیا گیا تھا تاہم اس مرحلے کے دوران ان کی موت ہوگئی تھی۔ ان جانوروں کی موت کی وجہ مبینہ طور پر آگ سے جھلسنے کے علاوہ دم گھٹنا بھی بتائی جاتی ہے۔
اس حوالے سے ایک ایسی بھی ویڈیو سوشل میڈیا پر وائرل ہوئی جس میں دیکھا جا سکتا تھا کہ ان شیروں کو پنجروں سے نکالنے کےلیے پنجروں میں آگ لگائی گئی۔ اس پر ردِ عمل دیتے ہوئے رواں ماہ کے آغاز میں اسلام آباد ہائیکورٹ کے چیف جسٹس نے برہمی کا اظہار کیا اور عدالتی فیصلے پر صحیح طریقے سے عمل درآمد نہ ہونے پر وزارت ماحولیات کی وزیر مملکت زرتاج گل کے علاوہ ماحولیات کے بارے میں وزیر اعظم کے مشیر امین اسلم اور وائلڈ لائف کے بورڈ کے 19 ارکان کو توہین عدالت میں اظہار وجوہ کا نوٹس جاری کیا تھا۔
واضح رہے کہ جب ان جانوروں کی ہلاکت کا معاملہ سامنے آیا اور عدالت نے اس پر نوٹس لیا تو پھر اسلام آباد ہائی کورٹ کو بتایا گیا کہ نیا وائلڈ لائف بورڈ جو کہ چند ماہ قبل ہی تشکیل دیا گیا تھا اس لیے سرکاری گزٹ میں اس نئے بورڈ کا نوٹی فکیشن جاری نہیں ہوا اس لیے پرانے گزٹ پر ہی اکتفا کیا جائے۔
پرانے گزٹ کے مطابق وزیر اعظم بھی اس بورڈ کے رکن ہیں۔ عدالت کا اس بارے میں کہنا ہے کہ نئے نوٹیفکیشن کے بارے میں جو بتایا گیا تھا عدالت نے اس کو جانوروں کی منتقلی سے متعلق درخواست پر چند ماہ قبل سنائے جانے والے فیصلے میں من و عن شامل کیا تھا۔ بورڈ کے دیگر ارکان میں مذکورہ وزارت کے سیکرٹری کے علاوہ حزب مخالف کی سب سے بڑی جماعت پاکستان مسلم لیگ نواز کی ترجمان مریم اورنگزیب کے علاوہ سینیٹر مشاہد حسین سید بھی شامل ہیں۔ اس کے علاوہ سی ڈی اے کے چیئرمین اور اسلام آباد کے مئیر بھی بورڈ کے ارکان میں شامل ہیں۔
چیف جسٹس نے توہین عدالت سے متعلق از خود نوٹس کی سماعت کرتے ہوئے ریمارکس دیے کہ نئے وائلڈ لائف بورڈ کا نوٹی فیکیشن ابھی سرکاری گزٹ میں نہیں چھپا جبکہ پرانے نوٹیفکیشن میں وزیر اعظم بھی اس کے رکن ہیں۔ انہوں نے کہا کہ وزیر اعظم کو تو معلوم بھی نہیں ہو گا کہ اسلام آباد کے چڑیا گھر میں کیا ہوا ہے۔
وزیر اعظم کے معاون خصوصی امین اسلم اور وزیر مملکت موسمیاتی تبدیلی زرتاج گل کے وکیل سلمان اکرم راجہ جمعرات کو عدالت میں پیش ہوئے اور انہوں نے اپنے موکلوں کی طرف سے جواب جمع کروانے کے لیے مزید مہلت مانگی۔ چیف جسٹس نے سلمان اکرم راجہ کو مخاطب کرتے ہوئے کہا کہ جب وزارت موسمیاتی تبدیلی نے ذمہ داری لی اور جب چیزیں غلط ہو گئیں تو انہوں نے یہ کہہ کر اپنی جان چھڑانے کی کوشش کی کہ یہ ہماری تو ذمہ داری ہی نہیں تھی۔انہوں نے کہا کہ عدالت کو بتایا گیا کہ کابینہ کو سمری بھیجی گئی اور بورڈ بنایا گیا تو عدالت مطمئن ہو گئی۔ انہوں نے کہا کہ جب چیزیں غلط ہوئیں تو کہا گیا کہ وہ نوٹی فکیشن گزٹ میں شائع ہی نہیں ہوا۔چیف جسٹس نے کہا کہ جو جانور تکلیف میں ہیں ان کی حفاظت کےلیے کوئی انتظام کیا جائے اور اس ضمن میں ماہرین کی خدمات لی جائیں۔
زرتاج گل اور ملک امین اسلم کے وکیل نے کہا کہ وہ عدالت کو یقین دلاتے ہیں کہ اس حوالے سے مناسب اقدامات کیے جائیں گے اور وہ عدالت کو ان اقدامات کے حوالے سے مطمئن کریں گے۔چیف جسٹس نے ریمارکس دیے کہ جہاں پر جانوروں کا کھانا چوری کیا جاتا ہو یا ان کے کھانے کے لیے مختص کردہ فنڈز میں خردبرد کی جاتی ہو وہاں کیا بات کی جائے۔ انہوں نے کہا کہ بین الاقوامی تضحیک سے بچنے کے لیے اسلام آباد کے چڑیا گھر کے جانوروں کی منتقلی سے متعلق تفصیلی فیصلے میں جانوروں کے کھانا چوری کا ذکر نہیں کیا۔ چیف جسٹس کا کہنا تھا کہ اور بہت کچھ تھا جو عدالت نے فیصلے میں نہیں لکھا ورنہ وہ ہمارے لیے اور بھی شرمندگی کا باعث بنتا۔انہوں نے کہا کہ سماعت کے دوران عدالت کو یہ بتایا گیا تھا کہ اس چڑیا گھر سے بہت سارے جانور غائب ہو گئے ہیں۔ سماعت کے دوران عدالت نے جن افراد کو توہین عدالت میں اظہار وجوہ کے نوٹس جاری ہوئے تھے ان سے استفسار کیا گیا کہ کیوں نہ ان کے خلاف توہین عدالت کی کارروائی شروع کی جائے۔
اس دوران اسلام آباد کے ترقیاتی ادارے یعنی سی ڈی اے کے چیئرمین عامر علی احمد نے عدالت سے غیر مشروط معافی مانگی۔ انہوں نے کہا کہ وہ عدالتی حکم کی توہین کا سوچ بھی نہیں سکتے اور بتایا کہ گذشتہ ماہ کی چھ تاریخ کو مرغزار چڑیا گھر کا کنٹرول بورڈ سے وزارت موسمیاتی تبدیلی کو منتقل کر دیا گیا۔ انہوں نے کہا کہ وائلڈ لائف مینیجمنٹ بورڈ نے عدالتی حکم کے بعد جانوروں کو ان کی پناہ گاہوں میں منتقل کیا۔ اپنے تحریری جواب میں عامر علی احمد نے عدالت کو بتایا کہ جانوروں کی ہلاکت کے واقعے کی بورڈ اور وزارت موسمیاتی تبدیلی نے انکوائری کرانے کا فیصلہ کیا۔ جواب میں کہا گیا ہے کہ اس وقت وائلڈ لائف مینجمنٹ بورڈ کی حیثیت صرف مشاورتی ادارے کے طور پر ہے۔
مقدمے کی سماعت کے دوران اسلام آباد ہائی کورٹ کے چیف جسٹس نے ریمارکس دیے کہ اہم شخصیات وائلڈ لائف بورڈ کی ممبرشپ لے لیتے ہیں لیکن ذمہ داری کوئی نہیں لیتا۔ انہوں نے پوچھا کہ جو لوگ جانوروں کی ہلاکت کے ذمہ دار ہیں وہ ذمہ داری کیوں نہیں لیتے؟ انہوں نے کہا کہ بااثر بورڈ ممبران ذمہ داری سے جان چھڑا کر چھوٹے ملازمین کو قربانی کا بکرا بنا دیتے ہیں۔ چیف جسٹس کے استفسار پر عدالت کو بتایا گیا کہ ابھی تک تمام بورڈ ممبران نے شوکاز نوٹس کا جواب جمع نہیں کروایا۔عدالت نے توہین عدالت سے متعلق اظہار وجوہ کے نوٹس پر تمام وائلڈ لائف بورڈ ممبران سے 25 ستمبر تک جواب طلب کر لیے ہیں۔