26نومبراحتجاج کیس،113پی ٹی آئی کارکن اسلام آباد پولیس کے حوالے
انسداد دہشت گردی عدالت راولپنڈی نے 26 نومبر کے احتجاج کے کیس میں گرفتارپی ٹی آئی کے 113کارکنوں کوراہداری ریمانڈ پر اسلام آباد پولیس کے حوالے کرنےکاحکم دیدیا۔
تفصیلات کے مطابق اے ٹی سی کے جج امجد علی شاہ نے اسلام آباد پولیس کی درخواست پر سماعت کرتے ہوئے پی ٹی آئی کے 113 کارکنان کا راہداری ریمانڈ منظور کیا، 113 میں سے 17 ملزمان کی ضمانت عدالت نے پہلے ہی منظور کی ہوئی ہے۔ملزمان کیخلاف اسلام آباد میں درج مقدمات کے باعث رہائی ممکن نہ ہوسکی۔
اسلام آباد پولیس نے عدالت کو بتایا کہ ملزمان کیخلاف 26 نومبر کے احتجاج پر تھانہ کوہسار اور تھانہ ترنول میں دہشتگردی کے مقدمات درج ہیں اور ملزمان کیخلاف پولیس کے پاس اہم شواہد بھی موجود ہیں کہ وہ 26 نومبر کے احتجاج کے دوران جلاؤ گھیراؤ اور سرکاری املاک کو نقصان پہنچانے میں ملوث ہیں۔
عدالت نےفریقین کے دلائل کے بعد 113 ملزمان کو اسلام آباد پولیس کی تحویل میں دے دیا۔
تحریک انصاف کی جانب سے عدالت پیش ہونے والے وکیل فیصل ملک نےکیس کی سماعت کے بعد عدالت کے باہر صحافیوں سے گفتگو کرتے ہوئے بتای کہ 5 ماہ کے بعد اسلام آباد پولیس نے عدالت سے کہا کہ انہیں شک ہےکہ یہ کارکنان اسلام آبادکے 8 مقدمات میں ملوث ہیں، اسلام آباد پولیس کے پاس کارکنان کے حوالے سے کوئی ثبوت نہیں، ہم نے عدالت سے استدعا کی کہ ہمیں وہ مواد دیا جائے جن کی بنیاد پر پولیس کارکنان کو لے جانا چاہتی ہے، ہم نے اسلام آباد پولیس سے کاپی کی استدعا کی وہ بھی فراہم نہیں کی گئی۔
پی ٹی آئی کے وکیل وکیل فیصل ملک کا کہنا تھا کہ تمام کارکنان کی نو نو کیسسز میں ضمانتیں منظور ہو چکی ہیں، اسلام آباد پولیس بے بنیاد درخواست پر کارکنان کو گرفتار کرنا چاہتی ہے، کارکنان کو ان مقدمات میں ڈالنے کی کوشش کی جارہی ہے۔
