اے پی ایس شہداء کی 11ویں برسی گورنر ہاؤس میں منائی گئی

آرمی پبلک سکول پشاور کے شہداء کی 11ویں برسی کے موقع پر گورنر ہاؤس پشاور میں قرآن خوانی اور خصوصی دعائیہ تقریب کا انعقاد کیا گیا۔
گورنر خیبرپختونخوا فیصل کریم کنڈی نے تقریب میں اراکین صوبائی اسمبلی ارباب عثمان خان، نثار باز، اعجاز خان، محمد جلال اور گوپال سنگھ، چیئرمین پاکستان ریڈ کریسنٹ سوسائٹی کے پی فرزند وزیر، شہداء کے والدین، سیاسی و سماجی شخصیات کے علاوہ آرمی پبلک سکول کے طلباء اور اساتذہ نے شرکت کی۔
ختم قرآن کے بعد اختتامی دعا چیف خطیب خیبر پختونخوا مولانا طیب قریشی نے کرائی، جس میں شہداء کے درجات کی بلندی، ملک میں امن و استحکام، ملکی ترقی و خوشحالی اور رحمتوں کی بارش کے لیے دعا کی گئی۔
گورنر اور دیگر شرکاء نے گورنر ہاؤس میں اے پی ایس شہداء کی یادگار پر پھولوں کی چادر چڑھائی اور شہداء کی یاد میں شمعیں روشن کیں۔
گورنر فیصل کریم کنڈی نے سانحہ اے پی ایس کے شہداء کو زبردست خراج عقیدت پیش کرتے ہوئے اس سانحہ کو ملکی تاریخ کا سب سے دردناک اور ناقابل فراموش واقعہ قرار دیا۔
انہوں نے کہا کہ معصوم شہداء کی عظیم قربانیوں نے قوم کو اتحاد اور حوصلے کا پیغام دیا، دہشت گردی کے خلاف جنگ میں ان کی قربانیاں کبھی رائیگاں نہیں جائیں گی۔
گورنر نے کہا کہ صوبے میں سکیورٹی کی صورتحال ایک بار پھر چیلنجنگ ہو گئی ہے لیکن کیڈٹ کالج پر دہشت گردانہ حملے کو کامیابی سے ناکام بنانے اور بچوں کی جانیں بچانے پر سکیورٹی فورسز کی تعریف کی۔
انہوں نے اس بات کی تصدیق کی کہ سیکورٹی فورسز بہادری سے دہشت گردی کا مقابلہ کر رہی ہیں اور حکومت اپنے اہلکاروں کے ساتھ کندھے سے کندھا ملا کر کھڑی ہے۔
انہوں نے اس بات پر زور دیا کہ صوبے میں امن کو یقینی بنانے اور معصوم جانوں کے تحفظ کے لیے تمام ممکنہ اقدامات کیے جائیں گے، خیبر پختونخوا کو پرامن اور ترقی یافتہ صوبہ بنانے کے اجتماعی عزم کا اعادہ کیا جائے گا۔