پی ٹی آئی نے دہشت گردی کے خلاف ساتھ بیٹھنے کےلیے شرائط عائد کردیں : خواجہ آصف
وزیر دفاع خواجہ آصف کا کہنا ہےکہ دہشت گردی کےخلاف ساتھ بیٹھنے کےلیے پی ٹی آئی نے شرط لگادی ہےکہ پہلے ہمارے بانی کو پیرول پر رہا کرو۔
مرکزی رہنما مسلم لیگ ن خواجہ آصف کا کہنا تھا کہ حکومت کل جماعتی کانفرنس کےلیے ان کے پاس جانے کو تیار ہے لیکن یہ قومی معاملہ ہے،اس میں غیر مشروط شرکت ہونی چاہیے، لیکن پی ٹی آئی کہتی ہے کہ خان نہیں تو پاکستان نہیں۔
خواجہ آصف نےکہاکہ ملک کےلیے اچھے عمل میں شمولیت کےلیے شرط لگائی جائے یہ پی ٹی آئی کا یقین ہے، ہماری قیادت جیل میں رہی، پارٹی تمام عمل میں شمولیت کرتی رہی، بےنظیر بھٹو دہشت گردی کا شکار ہوئیں لیکن ان کی پارٹی نے کبھی قومی مسائل پر کسی جگہ شرط نہیں لگائی۔
ان کاکہنا تھاکہ اگر پی ٹی آئی ساتھ بیٹھنے کو پہلے ہی مشروط کررہی ہے تو اس سے نیت پتا چلتی ہے، پی ٹی آئی والےایک شخص اور اپنے مفادات کی جنگ لڑرہے ہیں، عمران خان کا ایک بیان دکھادیں جو دہشت گردی کےخلاف دیا ہو، عمران خان کے جیل سے لمبے لمبے بیان آتے ہیں کوئی ایک بیان دکھادیں، خیبرپختونخوا دہشت گردی کا شکار ہے عمران خان مذمت کریں۔
