ایبٹ آباد،سہیل آفریدی کے قافلے کو بلدیاتی نمائندوں نے روک لیا

خیبرپختونخوا کے ضلع ایبٹ آباد کے علاقے حویلیاں کے قریب بلدیاتی نمائندوں نے صوبائی وزیر اعلیٰ سہیل آفریدی کے قافلے کو روک لیا۔

تحصیل کونسل حویلیاں کے چیئرمین عزیز شیرخان کی قیادت میں بلدیاتی نمائندوں نے فنڈز نہ ملنے پر احتجاج کیا۔

وزیراعلیٰ سٹریٹ موومنٹ کے سلسلے میں ہری پور سے مانسہرہ جا رہے تھے کہ ان کے قافلے کو بلدیاتی نمائندوں نے روک دیا اور چار سال سے بلدیاتی اداروں کو فنڈز جاری نہ ہونے پر شدید احتجاج کیا۔

وزیراعلیٰ سہیل آفریدی کی جانب سے فنڈز جاری کیے جانے کی یقین دہانی کے بعد مظاہرین نے قافلے کو راستہ دے دیا۔

یاد رہے کہ خیبرپختونخوا کے بلدیاتی نمائندے فنڈز نہ ملنے پر 4 سالوں سے مسلسل احتجاج کررہے ہیں، گزشتہ دنوں خیبر پختونخوا اسمبلی اور اڈیالہ جیل کے سامنے بھی احتجاج کیا۔

کچھ دن قبل صوبائی اسمبلی کے باہر خیبر پختونخوا کے منتخب بلدیاتی نمائندوں نے مصروف ترین خیبر روڈ کو بند کرکے احتجاج کیا اور بلدیاتی حکومت کو فنڈز اور اختیارات دینے کا مطالبہ کیا۔