افغانستان دہشت گردوں کی آماجگاہ بنا ہوا ہے : سردار ایاز صادق
اسپیکر قومی اسمبلی سردار ایاز صادق کا کہنا ہے کہ افغانستان دہشت گردوں کی محفوظ آماجگاہ بنا ہوا ہے، افغانستان کی سرزمین پاکستان کے خلاف دہشت گردی کےلیے استعمال ہورہی ہے۔ پاکستان متعدد بار افغان عبوری حکومت کو دہشت گرد تنظیموں کےخلاف شواہد دے چکا ہے
اسپیکر قومی اسمبلی ایاز صادق سے ہارورڈ یونیورسٹی امریکا کی طلبہ ایسوسی ایشن کے وفد نے ملاقات کی جس میں اسپیکر نے قانون سازی،اہم قومی،علاقائی اور عالمی امور پر پاکستان کے نکتہ نظر سے آگاہ کیا۔
سردار ایاز صادق نے امریکی یونیورسٹی کے وفد کو بتایاکہ پاکستان کو دہشت گردی اور موسمیاتی تبدیلیوں جیسے سنگین خطرات کا سامنا ہے۔
ایاز صادق نے وفد کو بتایا کہ افغانستان کی سرزمین پاکستان کے خلاف دہشت گردی کےلیے استعمال ہو رہی ہے۔ افغانستان دہشت گردوں کی محفوظ آماجگاہ بنا ہوا ہے۔
ان کاکہنا تھاکہ پاکستان متعدد بار افغان عبوری حکومت کو دہشت گرد تنظیموں کے خلاف شواہد دے چکا ہے،افغان سرزمین کے پاکستان کےخلاف استعمال کا معاملہ اقوام متحدہ میں بھی اٹھایا،اعلیٰ امریکی عہدیداروں کو بھی اس تشویش ناک صورت حال سے آگاہی دی ہے۔
ان کاکہنا تھاکہ دہشت گرد امریکا کا افغانستان میں چھوڑا گیا جدید ترین اسلحہ استعمال کررہے ہیں، پاکستان میں دہشت گردی کی آگ خطے کےدیگر ممالک تک بھی پھیل سکتی ہے، اس آگ سے پھر ہمسایہ ممالک بھی محفوظ نہیں رہیں گے، دنیا کو اس کا نوٹس لینا ہوگا۔
اسپیکر قومی اسمبلی کاکہنا تھاکہ پاکستان کی بہادر سکیورٹی فورسز دہشت گردی سے نبرد آزما ہیں، پاکستان نے دہشت گردی کےخلاف جنگ میں بھاری قیمت چکائی ہے،قوم اور سکیورٹی فورسز نے اس جنگ میں 90 ہزار سے زائد جانوں کا نذرانہ پیش کیاہے۔
انہوں نےکہا کہ پاکستان پڑوسی ممالک کے ساتھ خوشگوار تعلقات کا خواہاں ہے، پاکستان نےطویل عرصے تک 4.6 ملین افغان مہاجرین کا بوجھ اٹھایا۔
ایاز صادق کاکہنا تھاکہ پاکستان موسمیاتی تبدیلیوں سے متاثر ممالک میں صف اول میں شامل ہے، 2022 میں موسمیاتی تبدیلیوں سے بےپناہ جانی اور مالی نقصان ہوا۔
اسپیکر قومی اسمبلی کا کہنا تھاکہ آج اپوزیشن کی بڑی جماعت حکومت کو جعلی اور غیرقانونی قرار دیتی ہے،اپوزیشن قائد حزب اختلاف،چیئرمین پی اے سی،قائمہ کمیٹی سربراہی پر بھی بیٹھی ہے، اپوزیشن نے صرف پوائنٹ اسکورنگ کی،ایک بار بھی عوامی اور ملکی مسائل پر بات نہیں کی۔
ان کاکہنا تھاکہ بطور کسٹوڈین آف دی ہاؤس ایوان کو ہمیشہ غیرجانبداری سے چلایا، اپوزیشن کو حکومت سے زیادہ ٹائم دیا،پروڈکشن آرڈرز پر ایک قدم آگے بڑھ کر فیصلہ کیا۔
امریکی محکمہ خارجہ کا عمران خان سے متعلق سوال کا جواب دینے سے انکار
سردار ایاز صادق کاکہنا تھاکہ سوشل میڈیا پر پاکستان کے اصل چہرےکو نہیں دیکھا جاتا، پاکستان کےحقیقی تشخص کا پتہ پاکستان میں آکر چلتاہے۔
