ڈیڈ لائن ختم، اختر مینگل کا کوئٹہ کی جانب لانگ مارچ کا اعلان

سردار اختر مینگل نے کوئٹہ کی جانب لانگ مارچ کا اعلان کرتے ہوئے کہا کہ حکومت کو دی گئی ڈیڈ لائن ختم ہوگئی لہٰذا دھرنےکے شرکا کل کوئٹہ کی طرف لانگ مارچ کریں گے۔

بلوچستان نیشنل پارٹی (مینگل) کا مستونگ میں لک پاس پر 6 روز سے دھرنا جاری ہے۔ لک پاس پر دھرنے کے باعث کراچی کوئٹہ اور تفتان شاہراہ پر ٹریفک معطل ہے۔ پی ٹی آئی کا وفد دھرنے میں پہنچا جس میں سلمان اکرم راجا، علامہ راجہ ناصر عباس اور دیگر صوبائی رہنما شامل تھے۔

بی این پی کے سربراہ اختر مینگل نے خواتین کی رہائی تک احتجاجی دھرنا جاری رکھنے کا اعلان کیا اور کہاکہ خواتین کی ماورائے آئین گرفتاریاں قابل قبول نہیں،دو دن میں خواتین کو رہا نہ کیاگیا تو کوئٹہ مارچ کریں گے۔

اختر مینگل نے کہاکہ مذاکرات کےلیے بے اختیار حکومتی وفد آیا تھا، بے اختیار بلوچستان حکومت کہیں اور دیکھ رہی ہے۔

بعد ازاں اختر مینگل نے کوئٹہ لانگ مارچ کا اعلان کردیا اور کہاکہ حکومت کو دی گئی ڈیڈ لائن ختم ہوگئی لہٰذا دھرنےکے شرکا کل کوئٹہ کی طرف لانگ مارچ کریں گے۔

دوسری جانب بی این پی کے قافلے کو کوئٹہ میں داخلے سے روکنے کےلیے انتظامیہ کے اقدامات جاری ہیں،قومی شاہراہ لک پاس اور دشت میں مختلف مقامات پر خندقیں کھودی جا رہی ہیں، مستونگ اور مختلف مقامات کو کنٹینرز  لگاکر سیل کیا جا رہا ہے۔

 ڈونلڈ ٹرمپ نے پاکستان سمیت متعدد ممالک پر جوابی ٹیرف عائد کر دیا

خیال رہےکہ گزشتہ دنوں اختر مینگل کی قیادت میں بی این پی کا لانگ مارچ وڈھ سے شروع ہوا تھا تاہم مستونگ کے مقام پر راستے بند ہونے پر وہیں دھرنا دیا گیاتھا۔