پی ٹی آئی کے بانی اور سابق وزیراعظم عمران خان کی بہن علیمہ خان جھوٹے دعووں اور بیانات میں اپنے بھائی سے سبقت لے جانے کے چکر میں بڑی مصیبت میں پھنستی نظر آتی ہیں۔ ایف آئی اے نے الیکشن میں دھاندلی بارے بے بنیاد الزامات عائد کرنے پر علیمہ خان کو طلب کر لیا ہے۔ جس کے بعد علیمہ خان کے بھائی اور بھابھی کی طرح جیل یاترا کے امکانات روشن نظر آتے ہیں۔

خیال رہے کہ پاکستان تحریک انصاف کے بانی عمران خان کی بہن علیمہ خان انتخابات 2024 کو متنازعہ بنانے کے لیے زور و شور سے پروپیگنڈا کرنے میں مصروف ہیں۔ علیمہ خان کا دعویٰ ہے کہ پاکستان مسلم لیگ ن نے 8 فروری ہونے والے عام انتخابات میں دھاندلی کے لیے کمپیوٹر ہیک کر لیے ہیں۔ جس کے ذریعے الیکشن کے نتائج تبدیل کیَے جائیں گے۔

دوسری جانب تجزیہ کار مزمل سہروردی کا کہنا ہے کہ الیکشن میں عمران خان کو اپنی ہار نظر آرہی ہے اس لیے پی ٹی آئی قیادت اس طرح کے جھوٹ بول رہی ہے تاکہ جب ہار جائیں گے تو کہہ دیں گے کہ ہم نے تو پہلے ہی کہا تھا کہ نتائج تبدیل کیے جائیں گے۔ مزمل سہروردی کے مطابق عمران خان کی ہمشیرہ کی جانب سے انتہائی مضحکہ خیز دعویٰ کیا گیا ہے۔ علیمہ خان کا کہنا ہے کہ عمران خان نے ہدایت دی ہے کہ سب کو بتا دو کہ ن لیگ نے 8 فروری ہونے والے عام انتخابات میں دھاندلی کے لیے کمپیوٹر ہیک کر لیے ہیں۔ جس کے ذریعے الیکشن کے نتائج تبدیل کیَے جائیں گے۔تجزیہ کار نے کہا کہ ماضی میں عمران خان نے اپنے پروپیگنڈے کے طور پر 35 پنکچرز کی کہانی کا دعویٰ کیا تھا لیکن اس وقت اسٹیبلشمنٹ ان کے ساتھ تھی جس کی وجہ سے ان کا جھوٹ سامنے نہیں آیا تھالیکن اب صورتحال بالکل بدل چکی ہے اور اس بار ان کا جھوٹ کام نہیں آئے گا۔

مزمل سہروردی نے مزید کہا کہ ن لیگ اتنی موثر نہیں ہے کہ وہ پی ٹی آئی کے پروپیگنڈے کا مقابلہ کرنے کے لیے سوشل میڈیا سیل بنا سکے۔ وہ الیکشن میں دھاندلی کے لیے کمپیوٹر کیسے ہیک کر سکتے ہیں؟ تجزیہ کار نے کہا کہ 2018 کے عام انتخابات میں رزلٹ ٹرانسمیشن سسٹم یعنی آر ٹی ایس ڈاؤن ہو گیا تھا اور پی ٹی آئی نے وہ انتخابات جیتے تھے۔ لیکن ہم سب جانتے ہیں کہ پی ٹی آئی کے پاس آر ٹی ایس کو ڈاؤن کرنے کی ٹیکنالوجی نہیں ہے۔ انہوں نے مزید کہا کہ اسٹیبلشمنٹ اتنی بے وقوف تو نہیں ہے کہ وہ اپنے پاس موجود آر ٹی ایس کو ڈاؤن کرنے کی ٹیکنالوجی ن لیگ کو دے دے۔تجزیہ کار نے مزید کہا کہ اب عمران خان کو اپنی ہار نظر آرہی ہے اس لیے اس طرح کے جھوٹ بول رہے ہیں تاکہ جب ہار جائیں گے تو کہہ دیں گے کہ ہم نے تو پہلے ہی کہا تھا کہ نتائج تبدیل کیے جائیں گے۔

واضح رہے کہ بانی چیئرمین پی ٹی آئی کی بہن علیمہ خان کے خلاف ایف آئی اے کاؤنٹر ٹیررازم نے مبینہ ریاست مخالف نفرت انگیزی اور فوج و عوام میں تقسیم پیدا کرنے کے کیس میں انکوائری کا آغاز کردیا ہے۔ انہیں کاؤنٹر ٹیررازم ونگ ایف آئی اے ہیڈکوارٹر طلب کیاگیا ہے۔

ایف آئی اے کاؤنٹر ٹیررازم ونگ کے اسسٹنٹ ڈائریکٹر انویسٹی گیشن اعجاز احمد شیخ کی جانب سے علیمہ خان کو ارسال کیے گیے طلبی کے نوٹس میں تحریر کیاگیا ہے کہ ایف آئی اے کاؤنٹر ٹیررازم ونگ میں سیکشن آفیسر ایف آئی اے پالیسی وزارت داخلہ کی درخواست پر ریاست مخالف سرگرمیوں، نفرت انگیز مواد پھیلانے و مجرمانہ سازش کرکے عوام و فوج میں تقسیم پیدا کرنے کے الزامات کے تحت انکوائری نمبر 4/24 درج کی گی ہے جس پر تحقیقات جاری ہے لہذا وہ  کاؤنٹر ٹیررازم ونگ ایف آئی اے ہیڈکوارٹر اسلام آباد پیش ہوں۔

نوٹس 160سی آر پی سی کے تحت جاری کیا گیا، جس میں علیمہ خان سے کہاگیا ہے کہ انکوائری میں پیش ہوں۔ اگر پیش نہیں ہوتیں تو سمجھا جائے گا کہ ان کے پاس صفائی کے لیے کچھ نہیں اور ایسی صورت میں قانونی کارروائی عمل میں لائی جائے گی۔ طلبی کا نوٹس علیمہ خان کی لاہور میں

رہائش گاہ کے پتے پر ارسال کیا گیا ہے۔