پی ایس ایل سیزن 10 سےقبل ’فینز چوائس ایوارڈ‘ متعارف کرانےکااعلان
پاکستان کرکٹ بورڈنےپی ایس ایل کے10ویں ایڈیشن سےقبل فینز چوائس ایوارڈز متعارف کرانے کا اعلان کردیا۔
پی سی بی کے جاری کردہ اعلامیے کےمطابق شائقین اپنے ووٹ کے ذریعے گزشتہ ایڈیشنز میں بہترین پرفارمنس والےکھلاڑیوں کا انتخاب کریں گے۔
فینز چوائس ایوارڈ کیلئے6 کیٹگریز بنائی گئی ہیں جن میں بہترین بیٹر، بہترین باؤلر، بہترین آل راؤنڈر، سب سےقیمتی کھلاڑی،بہترین انفرادی باؤلنگ پرفارمنس اور بہترین انفرادی بیٹنگ پرفارمنس شامل ہیں۔
ایوارڈ کیلئےسب سے زیادہ ووٹ حاصل کرنےوالےکھلاڑیوں کا اعلان 11 جنوری کو پی ایس ایل ڈرافٹ کی تقریب میں ہوگا۔
پی ایس ایل کےچیف ایگزیکٹو آفسر سلمان نصیر کا کہنا ہے کہ ’ایونٹ کی کامیابی شائقین کے تعاون کے بغیر ممکن نہیں ہوسکتی تھی، ’فین چوائس ایوارڈ شائقین کے جوش و جذبے اور لگن کو سراہنے کا ہمارا طریقہ ہے،اس ایوارڈکےذریعے ہم انہیں اپنے پسندیدہ کھلاڑیوں اور لمحات کو سراہنے کا پلیٹ فارم فراہم کریں گے۔‘
خیال رہے کہ چند روز قبل پی ایس ایل انتظامیہ کی جانب سےایونٹ کےپلیئرز ڈرافٹ اعلان کے لیے وینیو کا اعلان کیا گیا تھا، ٹورنامنٹ کاڈرافٹ 11 جنوری 2025 کو بلوچستان کے شہر گوادر میں ہوگا۔
واضح رہے کہ2016 سے اسلام آباد یونائیٹڈ پی ایس ایل کی تین بار چیمپئن بن چکی ہے،جس میں لیگ کا افتتاحی ایڈیشن(2016) تیسرا(2018) اور آخری ایڈیشن (2024) شامل ہے۔
لاہور قلندرز 2022 اور 2023 میں دو بار جیت چکی ہے، پشاور زلمی 2017 کے ایڈیشن کی چیمپئن رہی، کوئٹہ گلیڈی ایٹرز نے 2019 کا ایڈیشن جیتا جب کہ کراچی کنگز نے 2020 میں پہلا ٹائٹل اپنے نام کیا، 2021 میں ملتان سلطانز فاتح بن کر ابھری۔
